A detene ayera ocho empleado di e compania minero Vale SA den cuadro di e investigacion di e kiebra di un dam recientemente, cu a laga un saldo mas di 160 morto y cu alrededor di 150 persona desapareci, segun fuentenan hudicial.
E detencionnan a tuma luga na estado Rio de Janeiro, Sao Paulo y Minas Gerais, a peticion di ministerio publico regional di estado Minas Gerais, cu a precisa cu e obhetivo di e operacion ta pa “investiga e responsabilidad criminal pa e dam kibra.”
Di acuerdo cu un comunicado di ministerio publico, entre esunnan aresta tin cuatro gerente di Vale, dos di nan ehecutivo y cuatro integrante di e respectivo ekiponan tecnico, tur di nan “involucra den siguridad” di e dam cu a collapse dia 25 di januari ultimo.
E arestonan a keda decreta pa un plaso temporal di 30 dia, a base di sospecho di participacion o autoria den centenares di crimen di homicidio califica, segun e fuentenan.
Ministerio publico ta pensa cu Vale, e productor y exportado di hero mas grandi na mundo, tabatin desde october 2018 informacion tocante e riesgo di collapse di e dam, segun documento interno di e compania.
E presidente di e empresa minero, Fabio Schvartsman, sin embargo, a subraya un dia prome durante un comparecencia dilanti un comision parlamentario cu ta investiga e tragedia, cu e informacion cu cual e compania tabata conta tocante e dam “no tabata indica ningun peligro inminente.”
