Rapport PWC tocante Bahia Principe 2015

ORANJESTAD – Bon Dia Aruba a haya na su disposicion e rapport cu Price Waterhouse Coopers a traha pa Aruba Tourism Authority na 2015, pa haya un miho bista riba e proyecto di un hotel na Sero Colorado, den e caso aki, y e tempo ey, e proyecto Bahia Principe. Un rapport cu actualmente ta haya cierto relevancia, pasobra e proyecto actual na Baby Beach lo ta situa riba e mesun tereno, y tin e mesun cantidad di camber (950).

Di e diferente aspectonan cu e rapport ta cubri, entre otro e parti financiero y e efecto cu esaki por tin riba economia di Aruba, nos a scoge pa e detayenan cu e rapport ta duna di e aspectonan di empleo, durante fase di construccion como tambe unabes den operacion. Tambe un impresion di loke e rapport ta ofrece pa loke ta vivienda. E rapport completo lo ta bay ta disponibel riba website di Bon Dia Aruba proximamente.

Basa riba e diferente calculacionnan haci di creacion di empleo durante construccion y operacion, e impacto total di trabao full time a ser calcula. E total di cupo di trabao pa emplea localmente ta di 1.500 cupo, durante un periodo di 48 luna pa construccion total y 881 cupo di trabao den operacion di 2018 te cu 2030. Durante e periodo di construccion e efecto indirecto y e efecto induci di empleo di e construccion lo añadi un total di 1,500 job extra (temporal). Pa loke ta e operacion di e hotel y tumando na cuenta e ‘multiplier’ (2.47) pa creacion di e empleo total, e 881 cuponan lo percura pa un total di 2.467 cupo di trabao, sea directo, indirecto y induci.

Segun e rapport, e proyecto lo ta un tremendo oportunidad pa empleado actual y futuro teniendo un hotel di categoria internacional na San Nicolas. Segun e productornan di e rapport a haya di comprende, e hotel lo bay den cooperacion extenso cu entidadnan local manera e facultad di Hospitality & Tourism y di Business Administration na Universidad di Aruba, y EPI pa e seccionnan corespondiente. E empresa tabatin pensa tambe programanan extenso di training na tur nivel, incluyendo training den exterior na otro filialnan di e cadena, manera na Jamaica, Republica Dominicana y Spaña. No ta conoci ainda ta kico den e caso actual e operador lo tin di ofrece.

Pa loke ta e aspecto di vivienda, e rapport ta señala cu tanto e area di Sero Colorado (Colony) como San Nicolas tin gran parti di edificio y vivienda cu ta den condicion cu ta bao di e standard di e resto di e isla. Hopi edificio ta poni pa huur y e rapport ta remarca cu hopi di nan por ta disponibel pa split nan den unidad mas chikito di un manera relativamente facil. Tambe e rapport ta señala cu na e momento ey (2015) e prijsnan tabata relativamente abao. E rapport ta menciona tambe e efecto riba demanda di vivienda considerabel durante e fase di construccion. E rapport ta señala cu ta trata di aumento di demanda den tur diferente categoria, mirando cu ta trata di tur nivel di personal, pero cu enfasis riba e categoria mas abao..

Tambe e proyecto lo tin su efecto riba e mercado di real estate comercial den e area. Esaki segun opinion di e productornan di e rapport lo no ta di inmediato, pero l tuma 3 pa 5 aña pa materialisa den un aumento di e prijs pa meter cuadra. Tambe ta e expectativa cu cierto propietarionan lo cuminsa drecha nan propiedad pa huur cu sea empleado di e hotel i cu turista. Nan ta indica esaki como un oportunidad pa companianan di real estate y di construccion. A largo plaso esaki lo por tin efecto tambe riba bishitante cu ta ripiti y cu ta interesa den cumpra propiedad, algo cu a mira caba den otro areanan di e isla.

Te aki un impresion di loke e rapport ta trata pa e aspectonan ilumina. Mester bisa cu esaki ta algun di e areanan sensitivo den desaroyo di un proyecto di e magnitud aki, mientras cu mercado laboral no ta brinda suficiente pa satisface tur demanda di labor. Tambe e aspecto di vivienda lo mester haya un contesta, pa no haya e efecto negativo cu e empleadonan di exterior mester competi riba e mercado di vivienda y apartamento actualmente disponibel. Den otro edicion mas tocante e multiple aspectonan cu e tipo di proyecto aki ta trece cu ne.

 

You May Also Like

1Apr, JO, ConstruccionPlaya2.jpg

Construccion na diferente parti di Oranjestad tin comerciantenan preocupa

Ora bo pasa den caya actualmente por mira diferente tipo di construccion tumando luga ...

Referendum Orchid Casino pa kibra impasse

E situacion na Orchid Casino tabata hopi tenso pero e sindicato FTA a logra un ...

gastonan 2.jpg

Controlaria General: Gabinete Eman no ta controla su gastonan

– Algemene Rekenkamer Aruba (Controlaria General) tin su rapport cla unda a evalua y ...

img_1443494592_922.jpg

Aguirre: Speransa cu Reino Hulandes lo no conoce frontera

AMSTERDAM – Segun informacion di nos colaborador na Noticia Cla, Marifer Aguirre Broca den calidad ...

23augNG ATA.jpg

A.T.A.: Ta reconoce cu e fenomeno di ‘sharing economy’ t’ey pa keda

Aruba tin potencial pa bira un lider na nivel mundial pa loke ta e ...