Senado di Brasil a aproba ayera un proyecto di ley, presenta na 2015 pa Partido di Trahadornan (PT), pa amplia e castigo pa delito di odio, despues di e ola di protesta cu a tuma luga den varios ciudad Brasileño pa e morto di un homber color scur na man di personal di seguridad di un supermercado na Porto Alegre.

“E proyecto di ley aki ta demostra cu e Senado ta para banda di sociedad, cu no ta di acuerdo cu racismo ni discriminacion, tal y como nos Constitucion ta dicta”, e senador di PT pa estado di Rio Grande del Sur, Paulo Paim, a bisa.

E texto, cu awo lo ser debati den Camara di Diputado di Brasil, ta modifica e actual Codigo Penal pa inclui como agravante cualkier motibo racial, religioso of etnico, of di procedencia, den perpetracion di un crimen, pa asina por aumenta castigo ora ta trata di delito di lesion of homicidio.

Te na e momento aki, e motibonan racial ta considera como un falta dentro di e legislacion, loke a supone ‘cu seguridad e impunidad’ di e tipo di delitonan aki, segun e senadora di Podemos Brasil, Rose de Freitas.

E morto di Joao Alberto Silveira Freitas na man di e seguridad priva contrata pa e supermercado na Porto Alegre y un agente di Polis Militar, a desencadena un ola di protesta masivo durante Dia de la Conciencia Negra, dia 20 di november ultimo, despues cu e vicepresidente, e general Hamilton Mourao, a sigura cu na Brasil ‘racismo no ta existi’.

E Instituto General de Peritaje di Rio Grande del Sur a punta riba chocamento como causa di e morto den su informe inicial, y e grabacionnan difundi te na e momento aki ta revela cu Freitas a ser choca durante casi cuatro minuut dilanti di un cantidad di testigo despues cu guardianan di seguridad a batie durante sikiera dos minuut.

Defensa di un di e guardianan, Giovane Gaspar da Silva, a nenga e motibo racista y a defende cu e obhetivo tabata ‘contene’ Freitas pasobra e tabata ‘completamente descontrola’ ya cu ‘ta sospecha tambe cu e tabata bao influencia di narcotico hopi pisa. E tabatin wowo abao y iris dilata’, el a bisa.

 

LEAVE A REPLY

Please enter your comment!
Please enter your name here