Autoridadnan Brasilero a confisca un cargamento di 1.5 tonelada di cocaina scondi memey di un carga di maishi, cu tabatin como destino e waf Spaño di Cadiz, ayera dialuna fuentenan oficial a informa.
E droga a wordo haya diabierna ultimo den un inspeccion den oranan di mainta na e waf di Sao Sebastiao, na litoral di estado di Sao Paulo, pa agentenan di Polis Federal y Aduana Federal.
Aunke Polis Federal prome a informa cu e cargamento tabatin un tonelada di cocaina, ayera dialuna Aduana Federal a aclaria den un comunicado cu e peso total di e droga tabata di 1.524 kilo.
E cocaina a wordo haya na e bodega di Unispirit, barco cu bandera di Antigua y Barbuda y di tripulacion Ruso, cu tabata para na Sao Sebastiao na espera di autorisacion pa bay Cadiz.
E paketenan di cocaina tabata scondi memey di e carga di maishi, pa loke tabata necesario saca tur e grano di e bodega pa despues extrae e droga.
E cocaina a wordo hiba na superintendencia di Polis Federal na Sao Paulo pa su destruccion.
E mesun Polis Federal lo ta e responsabel di investigacion pa e crimen di trafico internacional di droga.
Ya caba na augustus ultimo, Aduana a confisca na e waf bisiña di Santos, un cargamento di 192 kilo di cocaina cu lo a mester bay na Las Palmas, tambe na Spaña, scondi den un cargamento di carni congela.
E responsabel di waf di Santos, esun mayor di Latino America, a aumenta e confiscamento di cocaina den ultimo lunanan.
