(Infobae) – Gobernacion di Sao Paulo a confirma dos caso di variante Omicron di Covid-19, e dos prome cu a ser reporta na Latino America.

Secretaria di Salud di Sao Paulo “a confirma diamars ultimo e dos prome caso importa di e variante nobo Omicron di coronavirus na Brasil”, e oficina aki a bisa den un comunicado. “E confirmacion a ser haci despues di un siguimento genetico”, e institucion a agrega.

E regulador di Salud na Brazil, Anvisa, diamars ultimo a bisa cu un analisis di laboratorio a haya cu un biahero a aterisa na aeropuerto internacional di Guarulhos dia 23 di november cu un prueba negativo di Covid-19. Pero prome cu e biahe, su pareha a sali positivo y e muestranan a ser manda pa un analisis adicional, cu a identifica e variante Omicron.

“Na e momento ey, ambos a sali positivo y e hecho a ser comunica na Centro di Informacion Strategico di Vigilancia di Salud (Cievs) na Sao Paulo”, e organismo a comunica.

Pa via di e resultadonan positivo, Laboratorio Albert Einstein a tuma iniciativa di realisa e secuencia genetico di e muestranan. Ademas, e laboratorio a notifica Anvisa riba e resultadonan positivo di e pruebanan y e comienso di e procedemento di secuencia genetico. Danki na un analisis anterior, a identifica e variante Omicron.

E muestranan a ser manda pa un segundo analisis di confirmacion, e regulador a indica, ya cu di acuerdo cu protocolnan nacional, e material mester wordo manda na Instituto Adolfo Lutz (IAL) cu e fin di confirma e secuencia genetico.

Agencia tambe a informa Ministerio di Salud y Secretaria di Salud di Estado y Municipalidad di Sao Paulo riba e evento di salud aki pa e adopcion di medidanan di salud publico necesario..

LEAVE A REPLY

Please enter your comment!
Please enter your name here