(TheDailyHerald) – Di mesun manera cu GEBE no ta produci awa sino ta cumpr’e di Seven Seas, GEBE por laga generacion di coriente y e inversion den esaki na otro compania y despues cumpra electricidad pa distribucion na hogarnan, segun Canadian Global Investment Ltd a splica na Parlamento diamars.

Canadian Global Investment Ltd a ricibi skepticismo di parlamentarionan kende a bisa cu nan ta compronde e ‘sales pitch’, e parti di kier haci negoshi cu Sint Maarten, pero no ta compronde e beneficionan financiero pa e isla. E compania di Ontario, Canada, na 2020 a propone pa gobierno utilisa gas natural pa logra gastonan mas abao di energia pa e isla mientras ta garantisa produccion limpi sin riesgo di derame di azeta. Un stacion adicional di LNG (gas natural likido) na Port Sint Maarten lo sirbi cruceronan y yuda industria di cargo den continuacion riba caminda pa descarbonisacion.

E plan ta rekeri cero inversion di gobierno, segun Canadian Global, cu lo ta buscando pa inversion di un tercero a base di un acuerdo di compra di electricidad (power purchase agreement, PPA) cu compania di utilidad, GEBE NV.

E PPA ta defini tur termino comercial pa e benta di electricidad entre e dos partidonan, incluyendo na ki momento e proyecto ta bay cuminsa operacion comercial, schedule pa entrega di electricidad, penalty pa incumplimento, termino di pago, y terminacion.

Pero varios parlamentario a cuestiona e uso di un PPA. Rolando Brison ta teme cu lo limita gobierno den haci negoshi cu otro partidonan den futuro pa motibo di obligacionnan den e contrato, cual el a yama ‘bottlenecks’. Segun Claudius Buncamper esaki ta e caso. “Bottom line ta cu tur empresa fracasa anteriormente tabata mara na e PPA. Un PPA tin un clausula den dje: tuma y paga. Manera awo nos tin cu compra di awa tambe, ta nifica cu si bo no tuma e electricidad, ainda bo tin cu paga p’e. Pues si tin un calamidad y no por distribui electricidad, bo ta keda paga p’e”, Buncamper a bisa.

Presidente di Canadian Global, Stephen Cooper a sigura cu e PPA ta contene e tarifa base cu ta representa e punto di ‘break-even’ di e produccion di e compania, e ganashi rekeri pa cumpli cu obligacionnan financiero na e inversionistanan di e proyecto.

E PPA hopi biaha ta combina cu un BOT (build-operate-transfer) of acuerdo di concesion: ademas di obligacionnan relaciona na e benta y compra di electricidad genera, e compania tambe ta rekeri pa diseña, construi, opera y mantene e planta di electricidad segun specificacionnan acorda.
Den caso di generacion di electricidad cu LNG, e produccion lo tuma lugar na un plataforma riba lama ubica na Cay Bay dilanti di GEBE NV. E sistema lo ta diseña y construi pa Siemens Energy y opera pa Crowley Maritime Corporation, proveedor di LNG for di Puerto Rico. Crowley ta construi y opera bukering barges di LNG y lo duna LNG na e stacion proponi pa crucero na Port Sint Maarten.

Parlamentario Christophe Emmanuel a nota cu GEBE NV ya tin un concesion pa suministro di LNG. El a destaca cu nan haf ya tin concesion pa bende fuel na crucero, pero no a splica pakico e benta aki no a sucede ainda.

Industria maritimo, bao presion pa reduci emision di carbon di barco, ta yegando na consenso cu LNG lo duna un solucion intermedio na caminda pa un manera limpi pa fuel barconan.

 

LEAVE A REPLY

Please enter your comment!
Please enter your name here