Miles di Brasileño a ignora advertencia pa evita reunionnan masivo y a tene demostracion na fabor di presidente Jair Bolsonaro y contra su antagonistanan den Congreso y Corte Supremo ayera.
Bolsonaro mes a urgi sostenedonan pa no asisti na e demostracionnan, cual a ser anuncia varios siman atras, pa motibo di brote di coronavirus. Pero aparentemente el a cambia su opinion ayera mainta, y a participa den un rally den capital Brasilia, unda el a saca selfie y duna man na manifestantenan.
Oficina di Bolsonaro a anuncia diamars cu test a mustra cu e ta liber di e virus nobo a pesar cu su vocero y otro ayudantenan a test positivo despues di un bishita na Washington, unda nan a reuni cu presidente Mericano, Donald Trump.
“Cu tur cos den contra – prensa, e virus, e recomendacionnan – hende a subi caya. Esaki ta espontaneo”, e presidente a bisa.
Hopi di e manifestantenan na Rio de Janeiro a bisti mondmask mientras tabata carga borchinan den sosten di e presidente.
“Corupcion ta mata hopi mas cu e virus”, segun Alisson de Oliveira, di 42 aña di edad, maske el a reconoce cu e tabata preocupa pa e malesa.
E demostracion a tuma luga na momento cu Bolsonaro ta bringando cu partinan di Congreso tocante presupuesto federal.
Te awo, Brazil tin mas di 170 caso confirma di coronavirus.
Autoridadnan na Rio de Janeiro y Sao Paulo diabierna a prohibi reunion masivo, y gobernador di Rio a bisa cu polis lo hasta restringi acceso na beach, maske nan a djis para mira diabierna mientras e demostracion a tuma luga, y miles di persona a sinta bou solo riba beach Copacabana.
