Tur dia, dos biaha pa dia ta Brenda y su casa, Freddy ta hiba nan cachonan cana. Y tin biaha ta mira nan ta lucha, pasobra bisiñanan na Jamanota ta custumbra di wak nan ta cana cu 5 of hasta 6 cacho p’areu. No tur ta di nan, pero pa Brenda, e cuido pa e animalnan aki ta parti di su mission.

Brenda Jansen na December ta haci cinco (5) aña ta cuida (foster) cacho y tin biaha pushi. Tur ta animalnan cu di otro manera lo ta bandon ariba caya of hasta pio. Un trabou cu ta rekeri hopi tempo, esfuerso, dedicacion, pero tambe hopi alegria.

Tabata na 2016 cu un amiga, voluntario pa Sgt Pepper’s Friends a acerca Brenda pa prome biaha pa cuida cacho temporariamente, te ora cu haya cas permanente pa e animalnan. E fundacion ta un di e organisacionnan cu tin na Aruba pa rescata cachonan di caya. (E nomber ta di e cacho Sgt. Pepper di Rachel Brathen, Yoga Girl, kende a lanta e fundacion).

Na prome instante, Brenda a bisa cu no. “Mi tabatin tres cacho mi mes, incluso un Jack Russel cu tabata hopi activo. Mi no por a imagina tuma otro cacho, ni pa un periodo so.”

Pero na December 2016, net prome cu Pasco, su amiga a bolbe puntr’esi e por ‘foster’ un paar di cacho. E Jack Russel lamentablemente ya no tabatey (E cacho no a sobrevivi un mordi di un cascabel), y Brenda a dicidi pa tuma su prome cachonan pa foster y for di e dia ey, nunca mas a para di cuida cacho temporariamente. “Tur cu ta bin aki finalmente ta bay na un cas permanente. Mayoria biaha na Merca of Hulanda. Algun biaha na Aruba mes, pero mayoria ta bay otro pais.

E prome cachonan tabata tres puppies, pero e edad di e cachonan cu Brenda ta cuida ta varia. E ta tuma cachonan cu ta asina chikito cu e mester crianan na botter te na cachonan un poco mas bieu pero cu ta asina maltrata cu nan no sa con pa anda cu hende.

 

Brenda ta traha na cas y a bisa cu esey ta yud’e cu e trabou. “Si nan ta bottle-babies, mi mester cria nan durante mi trabou, pasobra nan mester come cada tres ora. Sea mi ta rek mi oranan di traha, pero e cachonan mester come. Asina mi ta planea mi dia pa percura cu mi ta na cas den tres ora. Tin biaha mi casa ta yuda. Pero mas tanto e no ta haci’e, pasobra cria un cacho na botter ta hopi trabou.

Sully y Baila

Brenda y Freddy no a pensa mes despues di e prome grupo di cacho si nan lo sigui of no. Brenda a haya e experiencia bunita y no a duda pa sigui tuma. Y desde e December ey, nunca su cas tabata sin un cacho cu no tabatey temporario, pa cuido y amor y asina prepara pa un bida cerca otro famia.

No tur ora e cachonan ta bin of bay na mes un momento. Por ehempel awor aki, Brenda tin Sully, cu tin un aña pero ta cerca dje pa seis luna. Tambe tin un Kiuska, cu tin 7 luna y ta na e famia como tres luna. Tambe tin Baila, cu apenas tin un siman na e famia.

Baila tin cuater luna y mey, y ta un cacho cu tin hopi miedo di hende. “Y mi tin un puppy di seis siman. Esey lo bay caba aki tres, cuater siman.” Puppies ta haya cas mas lihe. Un cacho manera Sully ta tarda pa haya un cas permanente, pero experiencia ta mustra cu eventualmente tur ta haya un cas y famia cu kier nan, sin importa e edad. Locual e tarea di Brenda ta pa no solamente cuida nan y percura pa e cachonan tin cuminda y un ‘shelter’ pero tambe pa percura cu nan ta custumbra cu hende, pa nan por haya confiansa y asina por bira un cacho di famia. Den otro palabra, ‘fostering’ ta yuda cachonan socialisa cu hende pa asina nan por bay. Algun ta tuma mas tempo cu otro. “E fundacion semper a haya hende pa adopta e cachonan, no importa con largo nan keda.

No tin duda cu Brenda ta haya stimacion pa e cachonan cu e ta cuida. E ta sinti contento di por yuda su avisa e sufrimento di cachonan di caya. “Mi sa cu ta manera un druppel riba un plaatchi cayente, pero ta yuda bida di e un cacho.

Brenda y Freddy ademas di nan mesun cachonan, tin galiña y a parti nan espacio pa tur e cachonan por tin nan espacio. Nan mesun cachonan ta cu n’e den su oficina of den camber y esey ta duna nan luga den e orde na cas.

Necesidad

E hecho cu e pareha ya tin cinco aña continuamente cu cacho pa cuida (y manera nan tin mas hendena Aruba cu ta haci e mesun trabou voluntario) ta ilustra e necesidad grandi. E cantidad di puppies cu ta keda nace sin cu tin hende pa tuma nan permanentemente den cas na Aruba ta keda halto.

E ta sigui, pasobra e mentalidad di comunidad no ta cambia asina lihe. Si hendenan ta sterilisa nan bestianan di cas, un dia e populacion di cacho di caya, cacho sin doño lo baha y te hasta desaparece. Esey ta e obhetivo, finalmente.

Locual Brenda ta ripara cambio den e tipo di cacho. Si antes e tipico cacho di caya di Aruba, e Aruba-cunucu, tabata uno hopi biaha bruin cu boca mas fini y preto, locual ta ripara cu e cachonan awendia ta mas tipo di Bullies.

Den otro palabra, nan ta cachonan cu ta bin di mescla di Pitbull, American Stafford Terrier por ehempel. “Por mira hopi mas di e karakteristica fisico di e tipo di e cachonan aki awor. E mescla di cachonan ta mas varia. Awor ta haya tur tipo di cacho cu ta mucho mas mescla cu locual tabata antes.” Segun Brenda no por conclui cu personanan no ta stima of cuida e cachonan cu ta haya e neishi nan aki, pero cu unicamente no ta sterilisa nan cu consequencia cu tanto cacho homber y cacho muhe, hasta cachonan di raza, ta cana rond y e consequencia ta keda produci neishinan nobo.

Sgt. Pepper’s Friends ta paga pa e cuminda y cuido medico di e cachonan, pero no tin duda cu ta e dedicacion ta contribui cu famianan na Merca y Hulanda ta sinti nan mes felis y contento cu nan miembro di famia cu a haya un bon comienso cerca Brenda Jansen.

LEAVE A REPLY

Please enter your comment!
Please enter your name here