E damanan di Britannia a gana e Dutch Caribbean Woman’s Soccer Cup 2017 cual a tuma luga na Raoul Illidge Sport Complex na St. Maarten den e dianan di 23 pa 25 di juni.
Nan a competi contra ekiponan di Corsou, St. Maarten y Boneiro pa asina mira ken por yama nan mes e miho ekipo di Caribe Hulandes. E organisacion di Qualichi Women Soccer Association di St. Maarten ta esnan encarga cu e organisacion di e torneo.
E ekipo di Britannia Lady Puma a hunga contra di SUBT Korsow prome cual e damanan Arubiano a gana cu 3-2. Despues nan a enfrenta Quilichi WSA di St. Maarten y esaki tabata un derota pa St. Maarten como cu Britannia a gana cu 5-0. Ayera e ultimo wega contra e seleccion di Boneiro nan tambe a gana cu 5-0. Mylene Croes a sali goleador di e torneo y Amy Henao e miho hungado (MVP).
Desde nan existencia e ekipo di Britannia dama tin varios aña ta sali campeon di Aruba den forma consecutivo y tin un elenco di bon hungadornan di futbol femenino cu mayoria formando parti di e seleccion nacional femenino di Aruba.
