Na cas durante e pandemia, BTS a crea ‘Dynamite’ y a lansa e cantica pa nan fanaticonan isola como un regalo. Awo e regalo a duna back na nan – den forma di nan prome nominacion pa premionan Grammy.
“Hopi hende ta tristo y deprimi awo pa motibo di e situacion di Covid y tabata manera nos sugerencia pa eleva tur hende”, Jin a bisa den un entrevista e siman aki cu AP.
“Nos tabata programa pa haci un tour di stadion rond mundo. No tabatin plan pa lansa un single manera ‘Dynamite’”, RM a splica. “‘Dynamite’ a duna nos exito enorme na Korea, claro, un nominacion pa Grammy, un presentacion, pues bo sa, bida ta hopi interesante.”
‘Dynamite’ a bira e prome hit No.1 di BTS riba e Billboard Hot 100 tempo cu el a wordo lansa aña pasa. Despues di añanan di registra hitnan Top 40 y yenando arena y stadionnan, e colectivo di shete miembro ta competiendo pa miho presentacion pop duo/grupo y tambe lo duna un presentacion durante e show diadomingo.
BTS ta e prome grupo di K-pop competiendo na e Grammys.
“Ta hopi dificil pa expresa den palabra”, Jimin a bisa di e nominacion. “Hasta awo ainda nos no por kere cu nos a wordo nomina, y nos lo por presenta na e Grammys. Pues, nos ta gradicido. Nos ta honra.”
E hit explosivo di BTS lo bataya otro grandi No. 1 – ‘Rain on Me’ di Lady Gaga y Ariana Grande – como tambe exitonan Top 10 manera ‘exile’ di Taylor Swift y Bon Iver, y ‘Intentions’ di Justin Bieber y Quavo. J Balvin, Bad Bunny y Dua Lipa ‘Un Dia (OneDay)’, cu tabata den cumbre di e clasificacion Billboard Hot Latin, ta completa e cinco nominado.
Nan presentacion na e Grammys lo marca nan segundo na e show di premio – nan a duna asistencia na Lil Nas X ora el a canta ‘Old Town Road’ aña pasa. E presentacion diadomingo ta sigui e transmision reciente di ‘MTV Unplugged Presents: BTS’, cu a mustra BTS cubriendo e balada rock popular di Coldplay, ‘Fix You’.
Den un tweet – den Koreano – Coldplay a yama e rendicion di BTS ‘bunita’.
“Coldplay a bin Korea como tres aña pasa pa un concierto grandi, y ami y J-Hope a bay nan concierto y nos a mira ‘Fix You’ e tempo aya y el a nifica asina hopi”, RM a recorda. “Nos ta spera di por traha cu nan, of talbes tin un reunion y bebe te of koffie of cualkier cos. Nos stima Coldplay.”
IFPI, e organisacion cu ta representa industria di grabacion global, a bisa siman pasa cu BTS tabata e banda mas bendi na 2020.
E banda actualmente ta trahando riba musica nobo – como grupo y como solista. Nan a bisa cu e nominacion di Grammy si ta crea algun presion pa nan proximo batch di cantica cu nan produci, pero nan no ta laga exito bay nan cabes. “Nos ta purba di keda humilde y pone nos pia riba tera y haci loke nos ta haci”, RM a bisa.
