Instancia ta depende di otro departamentonan publico pa soluciona problemanan ambiental

Bureau City Inspector ta wowo di comunidad, pero otro cu intermedia cu otro departamentonan publico y semi-publico, no tin mucho herment na su disposicion pa realmente penalisa comportacion cu ta funesto pa medio ambiente. Asina Hefe di Servicio BCI, Kevin Peterson a bisa ayera.

Peterson, hunto cu relacionista publico di BCI a invita medionan di comunicacion pa un conferencia di prensa particularmente pa atende cu e problema di e area conoci como Dam di Moko, cu ta mandando holor stinki pa henter e bario di Saliña y Moko. Un holor asina fuerte cu un persona di 68, bibando den cercania di e dam a bira malo.

Ta trata di un buraco enorme cu a yega di coba pa santo y piedra, pero cu pa motibo cu a bay hopi hundo a dal den un wowo di awa y for di e tempo ey, e buraco ta relativamente yen cu awa. Sinembargo, pa decadanan ta usa e buraco pa tira tur tipo di sushedad, incluso awa sushi di tankinan skeptico.

E trabaonan a cuminza for di 6 di October caba, ora cu e yamadanan a cuminza drenta di e molester di holor, segun Robby Rosel, relacionista publico di BCI a bisa, pero mirando e avalancha yamada cu a drenta a dicidi pa splica kico tur ta sosodiendo.

“Tabata un habitante di e bario cu a yama bisa cu tur hende tin problema cu holor masha stinki cu ta saliendo for di Dam di Moko. Riba e mesun dia, 6 di October, tres funcionario di BCI a acudi na e sitio y nan a constata cu berdad e holor ta hopi desagradabel,” Hefe di BCI Kevin Peterson a bisa. “Mesora mi a envolvi otro departamentonan pa mira kico por ta causa e holor aki, pasobra BCI mes no tin laboratorio. P’esey ma papia telefonicamente y manda e-mail pa Departamento di Salud Publico, DVG, cu si tin laboratorio pa haci e testnan necesario, y pa mira ki kimico nan tin pa tira den e awa.” Peterson a bisa cu e ta informa cu ta e mesun tipo di kimico cu ta usando na planta di purificacion di awa, RWZI, na Bubali, cu tambe tabata manda holor stinki. “Turistanan tambe tabata keha di holor stinki y DOW hunto cu DVG a logra soluciona e problema ey, y mi ta kere cu nan por haci algo mescos na Moko.”

DOW, DVG, DNM

Den otro palabra, e responsabilidad pa kita e molester di holor stinki na e Dam di Moko ta den man di dos departamento cu no ta BCI. Ademas di DOW y DVG, Direccion Naturalesa y Medio Ambiente tambe tin un responsabilidad pa tuma. E motibo pakico Peterson a dicidi pa duna un declaracion ayera ta pasobra el a ripara cu mas hende a cuminza keha y ta bisa cu no ta mira cu tin accion tumando luga. “Nos ta hayando hopi yamada telefonico. Nos ta haci nos best. Pero e no ta bay un dos tres.”

Segun habitantenan, ora cu e awa seca pa falta di yobida y combina cu tur e awa di pos cu ta basha diariamente den e dam, nan ta bira victima di molester. Peterson a bisa cu su City Inspectornan mes a señala cu den un radius di 500 meter nan tambe a keda confronta cu e holor fuerte. “Mester haci algo mesora.”

Peterson a bisa cu a informa tur departamento encarga, a manda e-mail y lo sigui yama pa percura cu ta tuma accion.

Keho pa hopi aña

E supuesto Dam di Moko no ta un dam di berdad. E ta un buraco cu a keda despues cu a coba hopi tempo pa santo y piedra. E ta un tereno priva cu e doño a permiti pa hende tira sushi na cantidad y cu bisiñanan a nota cu ta keda usa tambe pa companianan cu ta chica pos. Un practica cu ta ilegal, pero cu a pesar di keho, nunca a para. “E doño mes ta responsabel pa e actividad. Polis tambe ta na altura. Nan sa di e asunto. Pero hopi biaha esnan cu ta yama keha contra e trucknan di chica pos no ta tuma e number di e vehiculo. Sin e number no por actua contra esnan cu ta benta awa sushi den e dam.” Segun Kevin Peterson, DOW tambe ta na altura di e problema pero pa motibo cu ta trata di un tereno priva, ta e propietario mester tuma accion pa evita cu ta mal usa su tereno y no ta responsabilidad di Gobierno. E ‘Dam di Moko’ siendo cu no ta dam, como tal no ta cay bao responsabilidad di Santa Rosa cu ta encarga cu tur deposito di awa rond Aruba. Mas bien e ta cay bao supervision di Direccion di Naturalesa y Medio Ambiente, segun e Hefe di Bureau City Inspector.

Grito di desesperacion

Peterson a bisa cu e ta compronde cu e habitantenan rond di e dam ta disgusta. Y pa tal motibo mes e ta keda den contacto cu tur instancia cu realmente por haci algo. “Experiencia cu mi tin ta cu mi mester pone e mensahenan riba e-mail, pa ningun hende bisa cu nan no tabata sa,” el a enfatisa.

Y mescos cu e habitantenan di Moko ta pidi pa ayudo, BCI tambe mester di ayudo. Riba diamars a papia cu un persona di DOW unda a pidi’e pa laga saca un muestra di e awa pa manda laboratorio. Pero ayera ainda, Peterson lo mester a yama pa mira si berdad a bay saca e muestra. “Mi no ta un experto, pues mi lo no por bisa con largo e lo tarda.”

Peterson a admiti cu su servicio, esta Bureau City Inspector no tin e hermentnan necesario pa tuma paso su mes y ta depende di otro instancianan publico. “Nos ta manera wowo di pueblo. Nos ta core riba caya, ta mira e problemanan y nos ta involucra e instancianan cu no ta tur ora riba caya, pa splica nan e problema.” Y esey ta motibo tambe pakico Peterson a haya necesario pa splica comunidad riba kico ta e tarea y posibilidad di BCI.

En general BCI ta haya cooperacion tanto di Serlimar como DOW, particularmente ora mester lanta sushi. “Pero esaki ta algo cu no ta experiencia tur ora. Mi ta sinti cu nan por soluciona e problema aki na Moko relativamente lihe.”

BCI hunto cu DOW, DIP, DNM y otro ta forma parti di un comision di medio ambiente. Pero e encuentronan/reunionnan ta relativamente poco. E ultimo biaha cu e comision a reuni tabata tres luna pasa.

LEAVE A REPLY

Please enter your comment!
Please enter your name here