“Nos ta indjan di Macuarima,” asina ex docente di Cacique Macuarima School y actual parlamentario, Edgard Vrolijk a expresa, mustrando su compromiso pa yuda restaura e scol aki cu a bira victima di un candela intencional dialuna madruga.

E parlamentario a condena e acto aki, pero tambe e ta haya cu esunnan cu a hacie mester busca ayudo pa nan. “Nos ta condena e echo, pero nan tambe ta muchanan of hendenan cu un problema y nos tin cu busca ayudo pa nan,” el a bisa. Esaki ta un forma pa evita cu un acto di e caliber aki no keda ripiti. Vrolijk a bisa cu nos kier un comunidad sano, caminda nos tur tin cu uni y nos tur tin cu yuda. “E indjan di Macuarima ta positivo. Nos ta bay dilanti!,” el a expresa.

E parlamentario aki tabatin plania pa bin cu un accion di limpiesa den e scol menciona durante e weekend aki, pero e expresion di solidaridad y ayudo tabata asina grandi, cu ya caba e scol aki ta cla pa habri dialuna awor. Tanten e studiantenan di e cuater klasnan cu a wordo seriamente afecta pa e candela, a wordo ubica den otro scolnan bisiña, te ora cu e trabou di restauracion di e lokaalnan afecta lo bin cla.

Cla pa habri.
El a laga sa na Bon Dia Aruba cu berdaderamente nan a keda di organisa un accion di limpiesa, “pero cos a bay mas lihe cu a pensa.” E ayudo a drenta rapido, incluyendo entre nan e personal hoben y nobo di brandweer, combina cu algun veteranonan di e cuerpo aki. Entre diaranson y diahuebs nan a ruim op tur cos, locual ta permiti cu scol por cuminsa pa e restante 9 klasnan normalmente dialuna. El a agrega cu ayera mainta ainda algun mayornan a bin frega 3 lokaal cu nan tegelnan a keda bon, pero esey ta cosnan minimo, mientras cu e trabao mas grandi ta cla. “Scol ta limpi y a kita tur palabra malo y tambe a haya coriente y awa bek,” el a bisa na e matutino aki.

Parlamentario Vrolijk ta haya cu e caso di candela aki a laga un reflexion atras: “E tipo di actonan aki no mag di pasa mas.” E ta pidi comunidad, bario, mayornan pa educa nos yiunan. Bo por tin un problema cu maestro, polis of problema cu ken cu ta, pero e no ta kere cu scol ta e luga cu bo tin cu destrui. E problema social cu bo ta bin cune, bo ta drenta scol cune. Kiermen e ta bin for di bo cas, y eynan bo mester busca e solucion, el a bisa.