Tin casonan cu a yega di crea un impacto fuerte den nos comunidad. Un di nan tabata e caso tragico di homicidio di e dos ruman chikito, Rishandroh y Eugene cu a sucede tres aña pasa, caminda e mama di e mesun criaturanan tabata envolvi den dje. Ki sorto di ayudo of guia un persona asina por haya pa su rehabilitacion den nos sociedad bek?

Directora di Stichting Reclassering en Jeugdbescherming Aruba, Seraida Pemberton a declara na Bon Dia Aruba cu e no por bay den un caso specifico, ya cu nan mester respeta e privacidad di tur nan clientenan.

Pa aña nan ta haya un promedio di 150 cliente extra di loke nan por tin caba. Tin hendenan cu ta bao guia caba di e fundacion aki for di un aña anterior of te hasta prome cu esey. E promedio di tempo cu Reclassering ta guia un hende cu a cay den poder di husticia ta alrededor di dos pa tres aña. Tin algun di nan cliente cu den un aña ta stop. Pero semper tin hendenan nobo cu ta bin acerca.

Si e volumen aki ta grandi pa un isla chikito manera Aruba, Pemberton ta haya cu un caso mes ta hopi, vooral si nos trata di menor di edad. Pero pa un isla chikito, nos ta bayendo relativamente bon cu nos hobennan. Pero e ta considera cu e problema ta cu media ta pone atencion mas tanto na e cos negativo cu nos hobennan ta haci, y tiki riba e cosnan positivo. Si prensa ta enfoca riba e cosnan positivo -segun directora di Reclassering- nos por wak un balansa mas realistico. E tiki hoben problematico cu tin, dor di cu nan ta duna mas dolor di cabes, e ta mustra manera hopi di e hobennan ta dunando problema, locual no ta asina.

Asistencia y guia

Di otro banda ta asina cu tur cliente di Reclassering cu a haya su castigo pa e crimen cu a comete, comunidad tin cu compronde cu nan a sinta un castigo cu hues a sentencia nan cune. “Comunidad no por sentenci’e mas of dun’e mas castigo,” el a bisa.

Si un hende, despues di cumpli su castigo ta sali, mester compronde cu el a sinta su castigo caba, y e guia cu nan por dun’e, cual cliente cu ta, ta depende di e problema specifico di e cliente pa medio di un evaluacion profesional. Di e forma aki nan lo por determina cual ta e ayudo cu e persona tin mester.

Pemberton a bisa cu Aruba tin profesional basta ekipa pa duna e sosten na cada cliente cu ta sali for di KIA. Nan por ta sosten psicologico y psikiatrico. Locual si Aruba tin falta di dje ta cu hopi di e personanan aki, despues di paga nan castigo, no tin trabao pa logra un entrada. Tampoco nan no tin un vivienda stabiel. Nan ta factornan cu ta haci cu e persona of recidivista lo por cay bek.

Mientras cu e guia profesional, esey si Stichting Reclassering en Jeugdbescherming Aruba ta wordo ehecuta, caminda e recidivista por haya e sosten necesario. Lamentablemente den cierto luganan tin un tardansa, pero e ta kere cu nan lo sa di haci prioridadnan, pa wak cual caso ta di urgencia cu nan por trata di biaha.

E hendenan cu ta bay na Reclassering despues di a sinta un castigo, e instancia aki ta traha un plan di maneho pa nan, pa wak kico ta e areanan cu ta haci nan instabil. Eynan Reclassering ta brinda su asistencia pa yuda nan stabilisa e areanan ey, ya sea cu guia profesional di un psicologo of/y un psikiatra.