Colegio di Supervision Financiero (CAft) ta mira e resultadonan financiero cu Aruba a registra durante e prome trimester di 2026 como positivo. Segun e organo di supervision, e cifranan presenta den e prome Uitvoeringsrapportage ta mustra cu e pais ta riba e caminda corecto ora ta trata di maneho di finanzas publico.

Cu un surplus financiero di Afl. 118 miyon y un reduccion continuo di e debe nacional, CAft ta enfatisa cu Aruba ta cumpli cu e normanan fiscal vigente y ta fortalece su posicion financiero.

Sinembargo, CAft ta adverti cu e resultadonan positivo no mester crea un sentido di seguridad falso. Den su reaccion oficial, e Colegio ta indica cu ainda tin varios asunto importante cu mester ser atendi pa garantisa cu e progreso actual por ser manteni tambe den añanan binidero.

E resultado di Afl. 118 miyon ta representa 1,5% di Producto Interno Bruto (GDP), loke ta supera e norma di saldo financiero di 1% cu Aruba mester alcansa. Segun CAft, esaki ta confirma cu e posicion presupuestario di e pais ta fuerte durante e prome tres luna di e aña. E Colegio ta señala cu e resultado aki ta den liña cu e expectativa presenta anteriormente den e prome cambio di presupuesto pa 2026, caminda gobierno ta proyecta un surplus di Afl. 208 miyon pa henter e aña.

CAft ta atribui gran parti di e resultado positivo aki na e crecemento di e entrada di gobierno. Durante e prome kwartaal, e entrada total a yega Afl. 439 miyon, un aumento compara cu e mesun periodo di 2025. Segun e organismo, e crecemento aki ta relaciona principalmente cu mas entrada cu ta bin di impuesto indirecto y ingreso conecta cu actividad turistico.

E industria turistico ta sigui hunga un papel crucial den economia di Aruba y den e capacidad di gobierno pa genera entrada. CAft ta reconoce cu e movemento economico cu ta deriva for di turismo ta contribui significativamente na e resultado actual. No obstante, CAft ta recorda cu e dependencia aki ta forma un di e vulnerabilidadnan principal di economia Arubano.

Segun e organo di supervision, e situacion internacional ta keda incierto. Conflicto geopolitico, tensionnan comercial entre potencianan economico y reduccion economico den mercado importante por afecta e fluho di turista cu ta bishita Aruba. Un reduccion den turismo por tin efecto directo riba e entrada di impuesto y, consecuentemente, riba e posicion financiero di gobierno.

P’esey CAft ta enfatisa cu gobierno mester sigui maneha cu cuidao e resultadonan actual. Segun e Colegio, ta net den periodonan faborable cu tin oportunidad pa fortalece reserva financiero y prepara pa periodonan economico mas dificil.

Banda di gasto, CAft ta constata cu e desaroyo durante e prome kwartaal ta generalmente den liña cu loke tabata presupuesta. Gastonan total a alcansa Afl. 390 miyon, representando un aumento cikito compara cu aña pasa. A pesar di esaki, CAft ta identifica algun area cu mester di atencion special.

Un di esakinan ta e aumento den gasto relaciona cu e reparatietoeslag. Desde 1 di januari di e aña, e beneficio aki a ser aumenta, mientras cu e test di ingreso legalmente obligatorio ainda no ta implementa. CAft ta recorda cu ya nan a pone atencion riba e asunto aki den varios conseho anterior.

Segun e Colegio di supervision, e falta di un sistema pa determina kende realmente tin derecho riba e beneficio ta aumenta e impacto financiero di e medida y ta limita su efectividad. CAft ta pidi gobierno pa indica claramente con y ki tempo e test di ingreso lo ser introduci.

CAft ta relaciona e preocupacion aki tambe cu e reto cu Aruba lo enfrenta como consecuencia di e embehecemento gradual di su poblacion. Mas hende yega edad di pensioen, mas presion lo cay riba e diferente facilidadnan social y riba presupuesto nacional. Segun CAft, Aruba mester cuminsa desde awo cu e preparacion pa enfrenta e desaroyo demografico aki.

Un area unda CAft ta mira resultado positivo den dje ta e control di gastonan di personal. Te na final di maart, e gastonan di personal a keda na Afl. 122 miyon, practicamente igual cu e nivel registra durante e mesun periodo na 2025. Segun e proyeccionnan actual, Aruba lo termina e aña cu gastonan di personal ekivalente na aproximadamente 9% di PIB, kedando bao di e limite di 10% cu lo drenta oficialmente na vigor na 2027.

CAft a tuma nota cu gobierno tin intencion di establece un comision cu lo presenta propuesta pa garantisa cu Aruba por sigui cumpli structuralmente cu e norma di personal. E Colegio a indica cu e lo sigui e desaroyo di e iniciativa aki cu interes.

Otro indicador positivo menciona den e reaccion di CAft ta e reduccion continuo di e debe nacional. Na final di maart 2026, e debe di Aruba tabata Afl. 4.925 biyon, un reduccion di Afl. 154 miyon compara cu e posicion registra na final di 2025. Como consecuencia, e ratio di debe a baha te 61% di PIB.

Segun CAft, Aruba ta actualmente riba e bon caminda pa alcansa e meta legal di 50% di GDP prome cu loke inicialmente tabata calcula. E Colegio di supervision ta considera esaki un señal importante cu e medida fiscal implementa den añanan reciente ta dunando resultado.

No obstante, CAft ta indica cu ainda no tin un cuadro completo di e posicion di debe di henter sector colectivo. E definicion final di e sector colectivo ainda no a ser formalisa, loke ta haci dificil un evaluacion completo di e posicion financiero general di gobierno y entidadnan relaciona cu sector publico.

P’esey, CAft a solicita pa gobierno duna mas claridad tocante e asunto aki. Tambe CAft ta desea di haya informacion concreto tocante e manera cu e surplusnan genera pa entidadnan manera Algemene Ziektekosten Verzekering (AZV) y Sociale Verzekeringsbank (SVb) lo ser usa pa reduccion di debe, conforme e normanan estableci den ley.

E entidadnan publico a contribui considerablemente na e resultado positivo registra durante e prome kwartaal. AZV a registra un surplus di Afl. 11 miyon, mientras SVb a logra un resultado positivo di Afl. 26 miyon. Aruba Tourism Authority (ATA) tambe a aporta significantemente cu un surplus di Afl. 29 miyon.

Segun CAft, e aporte di e entidadnan aki ta un di e rasonnan principal cu e sector colectivo a logra e resultado positivo cu actualmente ta ser observa.

A pesar di e reaccion positivo riba entrada, gasto y debe, e CAft ta dedica atencion considerable na e retraso den establecimento di e fondo nacional di inversion. Segun e planificacion presenta anteriormente door di gobierno, e fondo mester tabata operacional no mas tarda cu e prome kwartaal di 2026.

Te cu aworaki, sinembargo, esaki ainda no a tuma lugar. CAft ta considera e retraso preocupante, pasobra gran parti di e recurso reserva pa inversion ya a ser transferi pa e fondo. Mientras e structura no ta formalmente estableci, e recursonan aki no por ser usa pa financia e proyectonan cu tabata ser contempla.

Segun CAft, esaki por crea situacion caminda inversionnan importante pa crecemento economico, infrastructura y fortalecemento di capacidad productivo di e pais no ta logra avansa segun plan.

P’esey, e e Colegio ta insisti cu gobierno mester formalisa e fondo mas pronto posible y desaroya un agenda di inversion multianual. Segun CAft, Aruba no solamente mester inverti mas, pero tambe inverti miho. CAft ta enfatisa cu inversionnan publico mester contribui na productividad, resiliencia economico y fortalecemento structural di e economia.

Otro aspecto positivo identifica den e rapport ta e mehoracion den transparencia y maneho financiero. CAft a subraya cu Aruba a logra avansa cu entrega di diferente cuenta anual atrasa y cu pa prome biaha e rapport trimestral ta inclui informacion tocante participacion di gobierno den empresa publico.

E Colegio di supervision ta considera esaki un paso importante den direccion di mas transparencia. Sinembargo, CAft ta opina cu ainda tin espacio pa mehora. Segun e Colegio, Aruba mester sigui traha pa crea un cuadro mas completo di e riesgo financiero cu empresa publico por representa pa gobierno y pa e presupuesto nacional.

Por ultimo CAft ta expresa satisfaccion cu e estado actual di e finanzas publico di Aruba. E ta reconoce cu e pais ta cumpli cu e normanan fiscal principal, cu entrada ta desaroya faborablemente y cu e debe nacional ta sigui baha.

No obstante, e mensahe central di CAft ta cu e bon resultadonan actual no mester ser considera como algo garantisa. Pa mantene e progreso aki, Aruba mester sigui inverti prudentemente, controla gasto, fortalece reserva financiero y atende puntonan pendiente cu tin riba mesa ainda.

Segun CAft, solamente door di mantene disciplina financiero y sigui cu reformanan necesario, Aruba lo por consolida e progreso alcansa durante añanan recien y sigura un posicion financiero stabiel pa futuro.