“Informacion no ta di sa e unico fuente di sa, ta experiencia bo mester experiencia pa yega na sabiduria” – (Albert Einstein)

Nos tur mester reconoce cu e Aruba cu nos tin awendia ta fruto di e trabao grandi cu nos Grandi/Pionero nan a haci den pasado. P’esey nos mester ta hopi agradecido pa esaki y tambe haci uzo di e tremendo experiencia cu e grupo aki a acumula. Awor cu nan a core nan careda di bida nos no mester lubida di wak pa nan tin un bida cu un calidad confortabel pa nan gosa resto di nan aña cu ta keda. Nan a pasa e finish line di nan carera activo y nan ta cu pensioen. Esey no kier men cu no mester regla pa nan tin un calidad di bida confortabel.

E bienestar di nos Grandi/Pionero nan ta un di e punto nan importante den e programa di RAIZ.

Den e organisacion di RAIZ a crea un comision/tribu cu lo encarga su mes specificamente cu e tarea di promove e bienestar di e grupo importante aki di nos pueblo.

RAIZ a pidi mi pa duna aporte pa organisa e comision/tribu aki y pone den funcion.

Den un clase cu nos tabata tuma hunto, un colega di e grupo a puntra mi si mi ta dispuesto pa yuda cu conseho na un grupo nobo cual tin hopi profesional hoben cu kier trece un cambio den e sistema politico na Aruba.

Ami Ling Wong tambe ta haya cu mester bin un cambio y mi ta kere cu mi por duna un aporte positivo cu mi saber y experiencia di hopi aña den diferente funcion den gobierno. Mi a dicidi di bin tira un bista. Ora mi a conoce e persona nan cu ta envolvi mi no a duda mas pa tuma e decision di stop di para na banda y drenta den e arena pa duna di mi parti tambe.

Den e prome reunion di e Comision/tribu pa nos Grandi/Pionero no sa cuminsa pa determina e punto nan principal cu nos lo cuminsa enfoca ariba dje.

Esey nan ta:

-Cuido personal pa esun nan cu mester di esaki

-Facilidad di transporte pagabel pa nan por move rond Aruba

-Finanzas: Facilidad cu ta sigura cu nan por sigui traha y keda cu suficiente den man despues di paga impuesto pa nan por hiba un bida confortabel

-Bienestar general: Cuido di salud, entretenimento, ehercicio etc.

-Integracion den economia y sociedad: Facilidadnan apta pa nan por keda traha(full-time of part-time) y wordo envolvi den funcion nan den comunidad (Boluntario entre otro) pa asina nan por sinti nan mes util ainda.

Pa logra esaki cambio den leynan existente ta necesario. Posibilidad logistico necesario tambe lo mester wordo studia.

RAIZ den un posicion di por haci un diferencia lo tin como prioridad grandi e meta pa promove un calidad di bida confortabel pa nos Grandi/Pionero nan.

RAIZ ya a cuminsa organisa pa por cumpli cu e meta aki.