Te ayera merdia tabatin cuatro caso positivo di coronavirus y 125 persona den cuarentena, asina Jurette Croes kende ta PR di departamento di Salubridad Publico (DVG) a informa oficialmente.

Pa evita cu e virus contagioso aki lo por sigui plama, cuater persona cu coronavirus ta den isolacion. Mientras cu alrededor di 125 ta den cuarentena. E cantidad di persona den cuarentena ta inclui e biaheronan, kiermen e personanan cu ta wordo permiti pa drenta Aruba, y tambe e personanan cu tabatin contacto directo cu un persona cu a resulta positivo.

Igualmente el a informa cu den e dianan aki, cantidad di yamada ta drentando na e call center 280-0101. Aunke Jurette Croes kende ta PR di departamento di Salubridad Publico (DVG) no a bisa claramente cu a collapse, pero si a pidi disculpa na comunidad, ya cu no por atende cu e tantisimo yamada cu ta drentando keto bay.

Nan ta buscando un solucion. Pero mientras tanto DVG ta pidi comunidad pa laga e linea aki un tiki habri pa solamente e hendenan cu tin e sintomanan. Of esun cu tabatin contacto directo cu un persona cu a resulta positivo na coronavirus. Kiermen pa e personanan cu eventualmente ta casonan potencial di coronavirus.

Croes a laga sa cu pronto DVG lo introduci un number cu lo ta destina solamente pa persona 60plus. Via e number ey nan tambe por yama y haci nan preguntanan, mirando cu nan ta e personanan den nos poblacion cu ta mas na risico.

El a bisa cu nan ta trahando riba otro linea di modo cu comunidad por haci uzo di un linea di WhatsApp tambe. Pero den caso cu bo tin pregunta of si bo mester algun aclaracion bo por hacie via nan conferencianan. Awe diahuebs 19 di maart pa 3’or atardi nan tin un presentacion online di Covid-19 atraves di e Facebook di Gobierno: Gabinete Wever-Croes y tambe riba e Facebook-page di Directie Volksgezondheid DVG Aruba. E ta un curso online pa esunnan interesa, muy specialmente dunadonan di trabou cu ta desea pa nan empleadonan ta bon prepara.

E demanda pa e tipo di curso aki ta hopi grandi y pa tal motibo DVG a organisa e curso virtual aki. Eugene Maduro di e seccion di Epidemiologia di DVG lo duna e curso aki y na final lo por haci pregunta tambe.

Ainda tin persona local pega den exterior cu ta desea di bin Aruba bek. Si nan ta confronta problema pa yega, nan tambe por yama na 569 6897 of 568 9251 of 563 7928.

Igualmente el a recorda comunidad cu por ricibi tur informacion cu ta sali di gobierno di Aruba y tambe di DVG via e Facebook-page di Directie Volksgezondheid DVG Aruba; y via e web-site: www.arubacovid19.org por