Dia 4 di september gobierno a manda pa Parlamento e proyecto di ley cu ta propone cambio den e ley di institucion di Serlimar, alabes ta propone cambio den e ley cu ta regarda impuesto extraordinario riba permanencia turistico den timeshare, alohamento y hotel, destina pa genera recurso financiero pa Serlimar por maneha desperdicio na nos isla.
E titulo di e ley ta referi tambe na e ‘areglo di derecho exclusivo y di impuesto destina na Serlimar pa maneho di desperdicio’. E derecho exclusivo ta referi na e maneho y explotacion di desperdicio pa loke ta e luganan unda ta deposita desperdicio, e insineradonan chikito pa kima desperdicio medico y algun otro categoria specifico, y e maneho y explotacion di un planta destina na kima desperdicio den un forno grandi cera.
E compania (Serlimar) segun e ley lo ta e unico cu ta encarga cu e ‘beheer van afval’ loke a primera bista ta crea e impresion cu e ley ta duna e compania un monopolio di henter e proceso total di recoleccion y procesamento di desperdicio. Esey no ta asina, pero ta rekeri algun splicacion. Pa esey e schema acompañante, procedente di e conseho di Raad van Advies riba e propuesta di ley aki, cu ta duna un impresion di con e fluho di desperdicio lo bay ta, segun e plan di gobierno conteni den e ley aki.
Pa loke ta e fase di recoleccion di desperdicio, na e vivienda y empresa y otro entidadnan, tin recoleccion di Serlimar directamente, di e empresanan comercial y desperdicio recolecta pa e ciudadano individual. Ta permiti e empresanan comercial haci cierto separacion di elemento cu por recicla o por exporta. Sin embargo, e resto di e desperdicio lo mester bay pa Serlimar. Na Serlimar lo tin un asina yama ‘Tipping Floor’ unda ta selecta desperdicio, den un asina yama ‘Upcycle Center’ unda Serlimar y otro iniciativa priva por separa, recycle y prepara pa exportacion e materialnan apropia pa tal. Ta separa tambe e desperdicio medico, bestia morto y e desperdico restante (‘slib’) di e plantanan di purificacion di awa. Tambe ta proyecta e separacion di substancianan dañino y peligroso den facilidad special administra pa Serlimar. E resto di desperdicio ta bay di Serlimar pa e facilidad pa kima desperdicio (Incinerator) pa cual actualmente ta den e proceso di licitacion pa scoge un partner pa opera esaki. E restante material lo bay pa un ‘sanitary landfill’ administra pa Serlimar.
Cobransa di impuesto destina na Serlimar
Tambe ta defini e asina yama ‘afvalstoffenheffing’ cu ta e impuesto, manera describi den articulo 7a, cu ta cobra pa yega na e recursonan cu Serlimar lo mester pa por opera na un manera rentable.
Serlimar lo haya e recursonan procedente di e impuesto pa tur hogar y tur entidad legal, es decir tur tipo di empresa o institucion. Den e caso di e hogar esun cu ta haya e cobransa lo ta e persona cu tin e registracion na WEB pa loke ta suministro di awa riba su nomber. Den caso di un entidad legal ta pone e cobransa riba nomber di e persona bao di ken e entidad ta registra den registro comercial, registro di fundacion o registro di asociacion. E ultimo aki no ta existi actualmente, pero por ta cu trahando aki pa futuro…?
Serlimar via e ley aki ta haya e potestad pa consulta e diferente registronan y tambe e administracion di WEB Aruba NV pa por yega na e datonan di e personanan responsabel. E compania lo tin derecho solamente pa uza e datonan aki pa cobra e pago cu e persona y entidadnan debe.
E tarifanan lo ta como lo siguiente:
- Cada hogar ta paga Afl. 210,- pa aña;
- Cada entidad legal ta paga Afl. 300,- pa aña.
Den caso di un hogar cu tin solamente un entrada di AOV, lo cobra solamente Afl. 30,- pa aña. Den caso di un hogar unda tin como unico entrada bijstand, ta posibel duna excension parcial o total di e obligacion. Den caso di un entidad legal cu por proba cu e tin meta social o caritativo, e tarifa ta bira cero.
Articulo 8 di e ley ta regula e cobransa di un ‘vergoeding’ pa recolecta desperdicio na cas o na e adres di e empresa/entidad legal. E cobransa aki no ta aplicabel pa esunnan cu por proba cu nan tin servicio di un otro compania pa recolecta desperdicio pa nan. E suma cu Serlimar ta cobra pa su servicio di pasa busca desperdicio lo ta Afl. 90,- pa aña. Pa loke ta e pago aki, e areglo special pa pensionado o persona den bijstand no ta aplicabel.
Resumiendo anto, un hogar particular ta paga normalmente en total Afl. 210,- mas Afl. 90,-: Afl. 300,- pa aña, a menos cu ta haya excension riba e prome parti (afvalstoffenheffing) como pensionado o persona den bijstand, o si ta trata di un entidad cu meta social o caritativo.
Nota di redaccion:
Den e resumen aki nos a trata solamente algun aspecto di e proyecto di ley aki, y a limita nos na duna e informacion relevante, sin opinion propio. Den otro publicacion nos lo trata otro aspecto, manera e conseho di Raad van Advies riba e concepto aki.
