Tin dokter di cas unda pashentnan ainda mester cana un caminda di cruz pa haya cita. Esaki Bon Dia Aruba ta haya sa di AZV. Relativamente e ta bay bon, segun nan, aunke cu ainda nan ta ricibi anualmente mas cu 100 keho riba trato y accesibilidad. E seguro nacional kier sinta cu e asociacion di dokter pa dialoga riba un sistema mas uniforme y asina mehora e situacion.

“Tin algun practica unda esaki ta bay bon, pero nos ta haya ainda algun practica caminda hende ta reclama,” vocero.Solange Tchong ta bisa Bon Dia Aruba. Cerca algun dokter di cas bo por yama entre 7:30 pa 8:30 di mainta pa traha un cita pa e mesun dia. Tin algun dokter cu tin e orario un tiki mas amplio por ehempel unda por yama entre 8’or pa 11’or di mainta. Tin practica cu por ehempel ta duna bo solamente 15 minuut pa bo yama y traha cita. Den un sistema asina, si tin 40 persona cu e dia e kier wordo atendi, bo ta haya hende cu ta yama y haya e liña constantemente ocupa anto no por traha cita.

Actualmente tin un situacion cu hopi dokter di cas kier traha cu un sistema na unda bo ta yama mainta pa bo por haya un cita e mesun dia, dependiendo di e gravedad di bo sintomanan of kico bo tin. Den un mundo moderno, e no ta husto pa laga un pashent warda manera por ehempel con e situacion tabata ta antes. Algun aña atras bo tabata haya un fila di hende para pafo for di 5’or di mainta ta warda pa traha cita cu dokter.

Servicio optimal
Sra. Tchong ta comenta riba e sistema di antes cu: “Nos tabata haya e sistema ey ineficiente. E dokternan di cas a opta pa un otro sistema. Pero si e sistema ta traha bon, nos no tin problema cu ne. Esey kiermen cu mester tin e accesibilidad manera cu e ley di AZV mes ta bisa.”

Cu accesibilidad, segun e, bo no mester wak solamente cu bo ta yega na haci un afspraak na bo dokter di cas, pero cu di berdad e servicio tambe ta optimal. Sra. Tchong: “Bo mester por yama dentro di e orario cu nan ta pidi bo, anto ora bo yama bo mester por haya un assistent na liña tambe.” No ta asina cu bo ta yama henter ora anto bo no ta logra pa haya un cita of no haya contacto mes. AZV ta den combersacion cu asociacion di dokternan pa asina cuminsa traha riba un miho sistema unda cu tur dokter ta brinda e mesun informacion y ta traha den e mesun manera of ta riba e mesun liña.”

“Nos ta kere cu e sistema actual ta uno bon anto cu por funciona na momento cu bo tin suficiente liña di telefon y suficiente assistent cu ta traha den bo practica.” Sra. Tchong ta sigui bisa cu si bo no tin esaki, ya caba henter e esencia of idea tras di e servicio aki ta cay afo.

Sistema uniforme
Actualmente e seguro nacional ta den un situacion unda nan tambe a tuma nota di diferente clientenan cu ta ventila nan disgusto riba rednan social como tambe ta yama of manda carta di reclamo. “Nos ta bisa cu nos kier yega un dia como AZV hunto cu e dokternan di cas pa traha cu un sistema uniforme y mas miho. Esey ta algo cu bo no ta cambia di un dia pa otro anto ta algo cu bo tin cu haci hunto, ” sra. Tchong ta comenta. Pa esaki AZVdi su banda ta den combersacion cu Hava (Huisartsen Vereniging Aruba). Mester di un miho sistema caminda cu tur dokter ta brinda e mesun informacion y traha mesun manera.

Keho
Pa ora di entrega keho na AZV, esaki mester ta por escrito prome cu tur cos. Segun ley esaki ta conta ora cu un hende tin cualkier keho, nan mester skirbi un carta of manda un email cual huridicamente tin validez. “Nos ta atende cu esakinan. Tur aña nos ta wak cu e kehonan ta entre 100 pa 135. For di e cantidad ey bo ta wak cu gran mayoria ta of riba nivel di trato, comunicacion y riba e area di accesibilidad.” Sra. Tchong ta bisa cu den general, pa locual ta kehonan riba telefon, esakinan ta wordo scucha y ser tuma como señal. AZV no ta esun autorisa pa haci investigacion riba kehonan di e manera con dokternan ta atende. Nan ta atende cu kehonan di indole mas general, e vocero ta splica: “E ta bon pa distingui e cosnan. Tur loke ta sospecho di mal trabou of negligencia medico, ta kehonan cu e pashent of asegurado di AZV mester percura pa entrega na inspeccion di Salud Publico. Nan tin mas forma y autoridad pa investiga casonan mas severo.”

Bon Dia Aruba tin un entrevista pendiente cu representante di asociacion di dokter pa asina haya nan banda di medaya riba e tema.