Campaña anual di vacunacion contra influenza a cuminsa

Campaña anual di vacunacion contra Influenza a cuminsa, na unda cu Departamento di Salud Publico ta haci un yamada na e gruponan di riesgo pa pasa busca nan vacuna completamente gratis na un di e localidadnan cu mas ta conveniente pa comunidad.

Influenza ta un infeccion cu ta afecta nanishi principalmente, garganta y pulmonnan, e infeccion por tarda generalmente un siman y ta caracterisa pa motibo cu e persona ta haya kentura cu temperatura halto, dolornan di curpa, dolor di cabes, tosamento seco, entre otro.

Mayoria di e personanan afecta ta recupera den un of dos siman sin cu mester haya tratamento medico, sinembargo, muchanan chikito, hende grandi y esunnan cu tin otro malesanan cronico por haya complicacion y hasta por fayece.

E griep aki ta transmiti di un manera hopi facil y den e mayoria di casonan na scolnan y casnan di cuido. Ora un persona ta tosa of ta nister, e gotanan chikito ta bula den aire cu distancia te hasta un meter cu por infecta un otro persona cercano, casi mesun cos cu e transmision di Covid-19.

Pa preveni e transmision personanan tin cu laba nan man frecuentemente y cubri nan boca y nanishi ora ta tosa, ora tin un clima friu e epidemia aki ta tuma luga den henter winter, mientras cu na paisnan cu clima tropical of mas cayente por aparece den henter aña, produciendo brotenan di manera mas regular.

Centers for Deseases Control and Prevention (CDC) ta señala cu influenza ta hopi mas contagioso den e tres of cuatro prome dianan despues cu e persona a wordo infecta, sintomanan por cuminsa di un dia pa otro pero tambe ta posibel cu hende por contagia y no ta presenta sintomanan.

Organisacion Panamericano di Salud ta calcula cu pa aña tin aproximadamente di 5 miyon di caso grave y casi 650.000 morto pa via di influenza.

Den e paisnan mas desaroya e mayoria di personanan cu ta fayece tin mas cu 65 aña di edad, epidemianan por ocasiona ausencia di muchanan na scolnan y falta di personal den tur area di trabao loke tambe ta ocasiona perdida den area productivo.

Debi na naturalesa di e virus y e menasa cu esaki ta representa, Organisacion Mundial di Salud ta haci un vigilancia di griep na nivel mundial durante henter e aña, pa lo cual nan ta convoca cientificonan di henter mundo. Den nan intercambio di informacion cientifico y material riba virus nan ta yuda determina e virusnan cu probablemente lo constitui un menasa den e proximo temporada y ta permiti dicidi dos biaha pa aña e composicion di e vacunanan.

Vacunacion ta e caminda mas eficaz pa reduci mortalidad pa via di griep, epidemianan di griep y un otro pandemia. Ta p’esey cu ta hopi importante pa realisa esfuersonan coordina di tur e profesionalnan di salud publico pa nan prepara nan mes y enfrenta e menasa pa salud publico mundial den tur su dimension.

Vacuna por tarda te hasta dos siman pa duna e persona e proteccion contra e virus aki ya cu ta yuda e curpa pa desaroya anticuerpo special cu ta combati e virus di influenza, e miho temporada di aña pa vacunacion ta entre luna di october y november.

Departamento di Salud Publico den un comunicado a indica cu bao di grupo di riesgo na Aruba, nan ta referi na personanan cu ta den riesgo pa desaroya complicacionnan grave manera bronkitis y pulmonia pa motibo di griep. E personanan aki ta e adulto mayor di 60 aña of mas y tambe personanan menor di 60 aña pero cu ta sufri di malesa cronico, malesa di nan sistema respiratorio y tambe personanan obeso, na estado of cu tin un sistema inmunologico abao door di malesanan manera di cancer y HIV.

Asina mes, nan ta informa comunidad cu esunnan cu tin interes pa haya e vacuna di influenza por pasa na un di e siguiente localidadnan, e adultonan mayor di 60 aña mester presenta solamente cu su carchi di AZV valido. E grupo na riesgo bao di 60 aña mester presenta cu nan recept di doctor di cas y nan carchi di AZV.

Aki bao ta sigui un lista di e diferente dia y localidadnan unda nan enfermeronan lo bay ta aplicando e vacuna di influenza:

• Dia 03 y 04 di november na Centro Curazon Santa Cruz entre 9or y 12or di mainta

• Dia 05 y 08 di november na Centro di Bario Brazil entre 9or y 12or di mainta

• Dia 09 y 10 di november na Centro di Bario Noord entre 9or y 12or di mainta

Esnan cu no ta cay bao grupo di riesgo pero kier cumpra e vacuna, esaki NO ta posibel na e postnan ariba menciona, pero si na seccion di Malesanan Infeccioso. Esnan cu kier cumpra vacuna mester haci un cita via number di telefon 522.4239 of 522.441. E vacuna tin un costo di 20 florin , cu por wordo paga unicamente electronico (swipe) no ta permiti placa cash.

Pa mas informacion por tuma contacto cu seccion di Malesanan Infeccioso na 5224239 of 5224241 durante dia y orario di trabao cu ta di dialuna pa diabierna entre 7:45 -11:45 di mainta y 1:15- 4:15 di atardi.