Un candela a kima un centro di refugiado riba e isla Griego di Lesbos, servicio di bombero a bisa ayera, causando daño considerabel na un bodega, pero no tabatin herido.
Tabata e segundo candela na un instalacion construi pa migrantenan, despues cu criminalnan desconoci a pega un centro di recepcion na candela dialuna ultimo. E bodega, cu tabata contene mueble y aparato electrico, a keda completamente destrui, segun un vocero di bombero a bisa AP bou condicion anonimo, mirando cu un investigacion ta andando.
E candela na e centro di refugiado a yega entre un enfrentamento tenso entre Turkia y Union Europeo riba ken ta responsabel pa e miyones di migrante y refugiado riba teritorio Turco y e miles cu a acumula recientemente na frontera Griego.
Miles di migrante bayendo pa frontera terestre entre Turkia y miembro di UE, Grecia despues cu gobierno di presidente Turco, Recep Tayyip Erdogan a anuncia anteriormente e luna aki cu no lo sigui preveni migrante y refugiado di crusa bay den paisnan di UE.
Grecia a manda riot polis y guardianan di frontera pa rechasa personanan purbando di drenta y e pais, y e area di frontera Griego desde e momento ey a mira confrontacionnan violento entre nan y e migrantenan. Diasabra, hobennan a tira piedra riba polis Griego y a purba kibra un heki na e frontera.
Na Istanbul ayera, Erdogan a pidi Grecia pa habri su frontera y permiti e migrantenan sigui bay na otro paisnan Europeo.
Turkia ta acusando Grecia di maltrata e migrantenan. A reporta cu cantidad di migrante a crusa den Grecia, a ser bati pa autoridadnan Griego, y forsa bek den Turkia.
Erdogan a exigi pa Europa carga mas di e peso di cuida refugiadonan, acusando UE di faya di entrega placa. El a anuncia cu Turkia – cu ta tin mas di 3.5 miyon refugiado Sirio – no lo ta e portero di Europa mas.
Ministernan di Exterior di UE a critica Turkia, bisando cu ta usa e desesperacion di e migrantenan ‘pa proposito politico’. Paisnan di UE ainda ta luchando contra e desaster politico causa pa un ola di migracion masivo cinco aña atras.
Miles di migrante a drumi den condicion teribel cerca di frontera Griego desde cu gobierno Turco a bisa cu nan ta liber pa bay, wardando oportunidad pa drenta Grecia.
