Ayera mainta lider di partido Union Patriotico Progresista (UPP) Candelario ‘Booshi’ Wever a convoca medionan di comunicacion pa haci entrega di un carta na Parlamento den cual ta vocifera su preocupacion pa e manera con ta tratando e ley di maneho di sushi.

Wever a splica cu for di siman pasa el a scucha for di minister nobo pa Medio Ambiente, Marisol Lopez-Tromp cu e ley di Serlimar tin un prioridad cerca dje; y parlamentario Alan Howell tambe a afirma cu ta bay pasa e ley manera cu e ta awor sin ningun investigacion. Wever a menciona cu su preocupacion a bira hopi grandi.

Asina mes, el a afirma cu e motibo di esaki ta cu aunke el a entrega un denuncia contra ex-minister Otmar Oduber, ‘ta parce cu niun hende ta worry cu esey’ pa motibo cu e ta kere cu compra di incinerator chikito ta algo grave pa Aruba, algo cu no por sigui asina.

Den e carta, Wever a expresa cu dia 14 di october 2019, partido UPP a manda un carta pa Parlamento na momento cu nan a cuminsa trata e cambio di e ley di Serlimar di 2005, tocante henter desaroyo riba tereno di maneho di desperdicio na Aruba y e problematica di dump Parkietembos.

Mirando cu e reunion di october di aña pasa a wordo suspendi, cu ta parce cu awor e reunion lo continua, nan a expresa cu nan ta keda para riba cu e cambionan proponi no ta pa bienestar di Serlimar ni di Aruba, sino cu ta pa legalisa actonan ilegal di corupcion di ex-minister Oduber.

Den mesun momento, UPP ta opina cu e ley aki no ta wordo husga riba ‘merito’, mas bien ta sirbi como un obheto di cambio (ruilhandel), esun cu ta legalisa cannabis medicinal pa miembronan di partido RED.

E ley cu UPP ta califica como ‘un ley mediocre’ y cu a wordo trata como ‘natte vingerwerk’ UPP ta kere cu no por traha un ley asina tanten e denuncia cu Wever como ciudadano a entrega dia 2 di december na Ministerio Publico contra e ex-mandatario menciona caba.

Wever a trece dilanti cu pa e motibo aki ta bal la pena pa ilustra pueblo y pa esunnan cu ta haci e trabou ey den Parlamento. “Hopi hende ta papia di Fake News, pero esaki ta sigur cu e documentonan cu nos a entrega ta di dje mes’ , el a sigura.

El a pidi pa cada un di e parlamentarionan tuma nan tempo pa pasa den documentonan, na mesun momento cu ta convenci cu si nan tin amor pa Aruba, e ley aki hamas lo por haya un mayoria.

Tambe el a comenta cu despues di haci entrega di e carta aki tin un peticion na Caft y na Algemene Rekenkamer Aruba (ARA) pa nan haci investigacion riba esaki. “No tin otro caminda pa haci un investigacion tanto financiero como forensico na Serlimar di tur cos cu a pasa e ultimo lunanan”, Wever a manifesta.

Wever a laga conoci cu e ley aki no tin nada di haci si ta cera of no e dump di Parkietembos; e ley aki tin di haci cu ‘pasa man y laba cabes di Otmar’ segun e mes a sigura, como tambe pa pasa mas medida pa e comunidad Arubano.

 

LEAVE A REPLY

Please enter your comment!
Please enter your name here