Den simannan recien, riba rednan social por nota un aumento drastico den e cantidad di post tocante puppies y pushi recien naci cu hende ta haya riba caya, den nan cura, of benta algun caminda. Esaki ta un problema grandi y ta causando consternacion entre comunidad. Mientras tanto, e fundacionnan pa bienestar animal ta abruma cu e cantidad di animalnan cu mester di ayudo.

Casi tur dia tin ciudadano ta pidiendo ayudo pa puppies of pushi cu a caba di nace. Fundacionnan local manera Nine Lives Aruba, Luna Foundation y Crijojo Trappers ta haya nan mes confronta cu tur dia tin solicitud pa ayudo pa busca un hogar pa e animalitonan aki, incluso mandando hopi di nan pa busca un miho bida den exterior, principalmente na Merca y algun na Hulanda. Sinembargo, e cantidad ta hopi mas cu loke un isla manera Aruba por carga.

Cada aña, na Aruba autoridadnan ta mata mas di 10mil animal cu ta wordo treci na e kill cage, awo conoci como Centro di Control di Cacho. Ta imposibel pa imagina un fundacion cu lo por tuma un cantidad asina grandi di animal pa cuida na nan centro, vooral ora ta tene cuenta cu un cacho ta biba 10-13 aña y un pushi entre 12-18 aña. Esey ta nifica cu den e periodo di bida di un cacho, esta 10 aña, na Aruba ta nace 100mil animal mas. No tin suficiente hogar ni fundacion na Aruba pa cuida di e animalitonan aki adecuadamente.
Esaki ta e motibo cu hopi di nan ta termina sufriendo riba caya.

Sterilisacion

Mientras tanto, e maneho di gobierno ta enfoca riba eutanasia y conscientisacion. Riba Facebook di CCC por mira cu ta piki cacho of pushi riba caya, ta post pa haya nan doño, y si no logra, ta mata e animal. Por nota si cu e postnan di CCC algun biaha ta resulta den adopcion, pero manera menciona anteriormente, adopcion riba su mes no por soluciona e problema.

Mundialmente ta conoci caba cu e unico manera pa reduci e poblacion di animal no desea riba caya ta mediante sterilisacion. Sterilisacion di cacho y pushi di caya, como tambe mascota, ta nifica cu no ta bay tin miles di puppy y pushi nobo tur aña. Segun website di WOAH, Organisacion Mundial di Salud Animal, “eutanasia, riba su mes, no ta un medida di control efectivo. Si us’e, mester hacie eticamente y den combinacion cu otro medida pa logra control efectivo a largo plaso. Tambe ta importante pa autoridadnan haya bon comprendemento di actitud di pueblo tocante cacho pa nan por desaroya un maneho cooperativo pa controla poblacion di cacho.”

Segun WOAH, lo mas importante ta controla e reproduccion di e animalnan, ya cu esaki ta preveni cu animalnan no desea ta nace, y ademas ta balansa e demanda pa animal cu e tamaño di e poblacion. WOAH ta conseha pa enfoca esfuersonan riba e grupo of individuonan cu ta considera como e fuentenan principal di animalnan no desea. Pa esaki ta recomenda involucra sectornan priva y publico, pa por cumpli cu demanda pa servicio, y ta conseha pa gobierno subsidia programanan di sterilisacion.

Na Aruba, fundacion priva, Stimami Sterilisami ta ofrece servicio di sterilisacion na un prijs reduci. Doñonan di mascota por registra pa esaki, pero tambe comunidad por aporta door di registra y cubri e gasto chikito pa un animal di caya y asina contribui pa reduci e poblacion di animal no desea. Por tuma contacto cu Stimami Sterilisami riba http://www.stimamisterilisami.com/