Tanto Cas Blanco como plataforma di red social Twitter ta nenga cu un hacker Hulandes a logra haya acceso na e cuenta di Twitter di e presidente Mericano. Vrij Nederland a reporta cu ‘hacker etico’ Victor Gevers a kibra den cuenta di Trump siman pasa pa mustra cu esaki no tabata sigura adecuadamente.

Un vocero di Twitter a bisa The Verge cu no tin ningun evidencia pa corobora e storia, agregando cu cuenta di Trump y otronan di perfil halto y relaciona cu eleccion proactivamente a ricibi seguridad extra na caminda pa eleccion presidencial Mericano.

Judd Deere, secretario di prensa interino di Cas Blanco tambe a rechasa e storia di e hacker, pero sin duna mas informacion.

Vrij Nederland y RTL Nieuws ambos ta reporta cu Gevers a comparti evidencia di su hack cu nan. Gevers a bisa cu e no a post ningun tweet ni a lesa mensahenan personal, maske esaki tabata posibel. El a hack den e cuenta puramente pa mustra cu e tabatin mester di mas segunridad.

Segun Gevers, password di Trump tabata ‘Maga2020!’ y e presidente no tabatin verificacion di dos stap habilita. Esey a keda agrega despues di e hack.

Esaki ta segundo biaha cu Gevers a hack cuenta di Trump, e prome tabata cu un grupo di otro hacker na 2016.

 

LEAVE A REPLY

Please enter your comment!
Please enter your name here