Ayera Alejandro Yandy, kende ta manager di Cas di cuido Oasis, situa na Monserrat 11-B tabata basta preocupa. Durante e siman aki, dilanti di nan cas di cuido tur dia, tabatin un rij di auto cu hendenan cu a bay haci nan test na laboratorio di Noord.

 

Nan tabata para nan auto menos di 4 meter for di nan luga, unda nan tin 10 cliente di edad grandi. Mirando e caravana di auto e rij tabata core hopi slow. Tabatin algun hende den auto cu nan glas di bentana tabata abao, nan no tabatin mask bisti y nan tabatin tosamento pisa.

 

Algun di nan di forma iresponsabel te hasta nan tabata scupi, poniendo den riesgo bida y salud di e clientenan di e cas di cuido aki, ya cu e biento ta supla duro na Noord. El a splica cu tur mainta nan cliente ta sali afo, pero den nan cura di cas mes, pa haya un tiki solo y pa nan por cana un rato pa move nan mes.

 

Pero mirando e situacion di cantidad di auto di hendenan cu ta bayendo test pa Covid, tanto gerencia y personal di Oasis, pero tambe e famianan di nan cliente, tabata basta preocupa. “Nos tin seis luna cu nos ta cuida nos mes y nos clientenan cu medidanan stricto di bio siguridad,” Yandy a declara na e matutino aki.

 

For di 30 di juni ultimo, nan no ta permiti bishita di hende den nan cas di cuido pa protege nan clientenan y nan famianan a sostene e decision aki. P’esey cu hopi preocupacion nan a mira cu e risico tabata grandi cu e cantidad di autonan cu hendenan sospechoso di Covid para dilanti di nan cas di cuido. Ademas nan no tabata sa ki momento nan tabatin mester di ambulance pa atende cualkier urgencia, y e hala di autonan por a stroba cualkier asistencia di emergencia pa nan clientenan.

 

P’esey inicialmente nan a tuma contact cu Polis y DVG pa busca un solucion y desvia e trafico aki, pero nan no tabata reacciona. Despues cu a tuma contact cu Bon Dia Aruba cu di biaha a denuncia e situacion aki riba nan plataforma digital. Finalmente nan ta gradici cu a bin un solucion, y polis a desvia e trafico pa evita cu bida y salud di nan clientenan y personal di Cas di Cuido Oasis, por a core peliger.

LEAVE A REPLY

Please enter your comment!
Please enter your name here