(NLTimes) – Un potret mustrando un cas blanco chikito, rondona pa e paisahe di La Palma haci preto pa lava, shinishi volcanico y huma, a ser mira rond di henter mundo. E cas aki, cu a sobrevivi mientras centenares di otronan a keda destrui pa e erupcion inusual di e Cumbre Vieja, a keda yama e ‘cas di milager’ online, y tabata diseña pa e Hulandes, Ada Monnikendam, segun AD ta reporta.

Monnikedam ta biba na La Palma pa varios decada. Hunto cu su casa, e ta doño di e compania cu a diseña y construi e cas pa un pareha Danes alrededor di 30 aña pasa. Segun Monnikedam, e pareha, kende no a bay na e isla desde e comienso di e pandemia, tabata encanta di haya sa cu nan cas a sobrevivi. “Nan no kier papia cu ningun hende pasobra nan no por stop di yora”, el a bisa noticiero Britanico, BBC.

Volcan Cumbre Vieja a haci erupcion riba diadomingo, despues di miles di temblor den e dianan prome. Fluho di lava a destrui centenares di edificio y hogarnan riba e Isla Canario cerca di costa di Maroco durante ultimo dianan. E cas di milager ta ubica na El Paraiso, unda mas cu mita di e casnan y e scol local a keda destrui.

E storia di e cas aki cu a sobrevivi tambe a haci un impresion cerca embahador Hulandes, Jan Versteeg na Spaña. “Entre tur e tristesa hopi biaha tambe tin partinan briyante, manera e cantidad di storianan tocante hende cu ta yuda otro of ta haci nan mes util door di, por ehemplo, evacua e cantidad di animalnan for di e area. Y e storia special di un cas chikito cu milagrosamente a scapa.”

 

LEAVE A REPLY

Please enter your comment!
Please enter your name here