(YahooNews) – Un cantidad di potret di laptop di Hunter Biden a bira disponible pa publico a traves di un website cu a lansa ayera.

E website BidenLaptopMedia.com ta bay tin casi 10mil potret for di aña 2008 te 2019 y a tuma lunas pa completa, segun Garrett Ziegler, fundador di e nonprofit Marco Polo, a bisa Fox News Digital.

El a bisa cu a dura un par di luna pa pasa door di e alrededor di 10mil potret y redacta partinan intimo riba e potrenan. El a bisa cu su organisacion ta para pa “berdad y transparencia,” y cu “si pueblo Mericano kier sa kico nan Prome Famia ta, nan ta bay haya sa. Nos no ta bay saca potret cu ta mustra famia Biden den bon luz.”

Ziegler tambe a nota cu a redacta varios potret conteniendo informacion priva – incluyendo imagen conteniendo number di Seguridad Social, informacion di banco y number di credit card. Adicionalmente, a redacta varios potret sunu di Hallie Biden, viuda di Beau Biden.

Di e cantidad di potret haya den e laptop, Ziegler a duna Fox News Digital dos nunca antes mira. Un ta mustra Hunger Biden cu su ex-pareha Zoe Kestan na 2018. E otro – mustrando un cantidad di droga y pakete di condom riba un mesa – tabata di un combersacion di Hunter riba mensahe di texto cu Hallie Biden – viuda di Beau Biden y ex-amante di Hunter Biden – e mesun aña.

Dunando mas informacion riba e tipo di contenido cu por spera riba e website, Ziegler a bisa cu algun contenido cu no tin “balor noticiero” no ta bay aparece. Pero el a bisa si cu “ta bay ta un recuento completamente autentico di e potretnan riba e aparato.”

Describiendo e esfuerso como “e exposé mas completo di cualkier Prome Famia Mericano mientras nan ta den oficina den historia di Merca,” Ziegler a bisa cu e tipo di potret cu ta comparti riba e website ta esnan cu tipicamente “ta bira disponible solamente despues cu habri e archivonan presidencial y e potretnan ey ta detaya solamente su tempo den Oficina Oval mientras e tabata presidente.”

E tambe a bisa cu e website ta bay usa “un app di mira potret cu ta bay permiti usuarionan mira e metadata den e potret. “Nan ta bay por wak unda a saca e potret, ki ora el a wordo saca, si e tin coordinada di latitud y longitud mara na dje,” el a bisa.

Ziegler tambe a nota cu videonan for di e laptop ta bay ta disponible na un fecha despues.

Describiendo pakico e ta bay dura mas largo pa upload e videonan di e laptop riba e website, Ziegler a bisa cu su team mester usa herment di AI pa asisti cu censura di porcion di e videonan pasobra “tin asina hopi pornografia.” Ziegler a bisa cu tin “cantidad” di potret cuestionable en particular cu e ta kere cu periodistanan mester mira.

Ayera, asina hopi hende a purba di mira e potretnan cu e website a crash.

Cas Blanco y abogado di Hunter Biden no a responde na un solicitud pa comentario.