Caso coordinador victoria anticipa

You win some, you lose some’, por ta e expresion adecua na e momento aki pa describi resultado den corte pa gobierno. Den e caso aki un ex-coordinador di e anterior gabinete a bay corte contra gobierno, cu a considera cu e no ta un ambtenaar y a termina su contract. Hues no solamente a duna gobierno rason pero a haci algun observacion poco usual pa describi loke e ta pensa di e manera cu e gabinete anterior a actua, specialmente e cuestion di core regla cos pa hende na ultimo ora, ignorando e poco procedementonan cu tin pa nombramento di ambtenaar.

Basicamente, den e caso treci dilanti, no tabata trata mes di nombramento sino di extension di un convenio laboral segun ley civil, por lo tanto no tabatin ni e comienso di un proceso normal pa nombra un ambtenaar. En corto bisa, un decision di un ministro o un conseho di ministro no ta constitui un nombramento, pasobra ta gobernador ta e ‘bevoegd gezag’ den esey. Realmente e caso aki a muri prome cu el a cuminsa pasobra e hues den asunto di ambtenaar a yega na e conclusion cu e no tabatin un ambtenaar su dilanti y por lo tanto no a yega na trata e caso. Ta tristo si cu politiconan experimenta ta duna hende di kere cu nan tin un posicion huridico cu nan no tin mes. Un pregunta cu por surgi ta, pakico e gobierno anterior no a tramita e nombramento como ambtenaar anto. Nos no conoce tur detaye pero ta imaginabel cu nan lo a bay pega cu e gobernador, cu tampoco den e caso aki ta djis ‘firma bij het kruisje’ manera algun sabio den pasado reciente tabata kier laga nos kere.

Ta di spera cu nos por keda den futuro libra di e tipo di triki di ultimo ora aki, cu ta costa comunidad placa y ta daña tambe e imagen di gobernacion en general. Ademas no ta prome biaha cu un hues ta tuma posicion fuerte contra e tipo di decision aki di ultimo momento. Den pasado a yega di sucede cu un hues a considera cu realmente ta papiando aki di un ‘conspiracion di e gobierno saliente y e persona individual contra interes di e pais.’ Den e caso actual, y sigur ora a bin dilanti un caso den cual e anterior ministro encarga cu Infrastructura tabata envolvi, hues a papia palabranan fuerte. No cu esey lo por afecta consenshi di e ex-mandatario ey, pasobra manera e mes a bisa den parlamento, e no ta…

Sin embargo, nos por ta contento cu e caso ehemplar aki, pero esey ta resolve henter e problema cu nos tin cada tanto tempo den gobernacion? No completamente. Un mandatario, nos ta papia aki en general, por saca e conclusion cu e mester cuminsa hopi mas tempran cu pone su hendenan di confiansa riba un trayecto di nombramento, cu e resultado cu ora tempo yega pa bay, tur hende ta bon posiciona caba. En realidad esey ta sosodiendo pa hopi aña caba, pero den e caso di e gobierno anterior nan a bin ta maneha un politica diferente, unda ta nombra grupo grandi di hende directamente na despacho di e ministronan, pa nan por maneha hopi asunto nan mes, sin cu nan mester recuri na asistencia di e departamentonan concerni. Di e manera aki tanto maneho general (beleid) como parti di ehecucion a ser hiba pa e despacho. Esaki tabatin como motivacion cu e aparato publico ta ineficiente, inflexibel, y ademas cu hopi ambtenaar cu nan ta considera di e otro color politico. Esaki tabata nan hustificacion pa tin centenares di hende na nan despacho, cu e excuus cu ‘nan ta bin cu nos y nan ta bay cu nos.’

Realmente ta un remedi tin, cu por cura un bon parti di e malo aki, y esey ta e creacion di un organismo no politico cu ta recluta, entrevista, selecciona y nombra funcionario publico, segun e plannan di personal aproba di cada departamento. Nombramento di esunnan cu ta forma e dirigencia di e organismo lo por tuma lugar di e manera cu ta haci esaki caba den otro caso, manera Rekenkamer, Raad van Advies, etc. Naturalmente esaki no ta implica cu e nivel politico no ta involucra mas. Nan papel mester ta di defini maneho, y den esey defini tambe ki tipo di personal mester pa implementa e maneho cu e nivel politico ta diseña. A traves di e adaptacion di e plannan di personal ta percura pa, segun cu desaroyonan exterior ta obliga e aparato gubernamental pa adapta nan exigencianan specifico cu nan tin pa loke ta nan personal. Aki ta unda e mandatario di turno ta haya oportunidad di demostra kico su vision ta pa e area cu ta su responsabilidad.

Y di mes awor nos a aterisa na un aspecto cu ta di suma importancia pa e proximo añanan: hunto cu reduccion di e aparato gubernamental, pa motibo financiero, ta bin e tarea di modernisa e aparato tambe, hacie mas apto pa atende e retonan actual y di futuro. No ta facil pa haya comprension den comunidad pa esaki, pero e ta necesario si.

You May Also Like

Maneho ambiental ta invisibel

Ora prensa ta buscando contesta pa pregunta cu ta surgi encuanto maneho di medio ...

Papel di prensa tambe den bon gobernacion

Tempo ta bula. Ya ta un aña pasa cu nos a laga nos pensamentonan ...

Reforma fiscal pa ken?

What’s in it pa sector priva? Den nos Editorial di ayera nos a trata ...

Hulanda cu miedo di kima curpa cu awa friu?

Pasonan hudicial ta bon tuma, awor sigui… Desde aña pasa a cuminsa haya señal ...

Corsou dilanti decision dificil

Despues di bastante turbulencia, inclui intervencion di gobierno di Reino, diabierna venidero tin eleccion ...

Sindicalismo birando mas fuerte?

Of e ta un fenomeno limita? E referendum teni recientemente na un banco a ...