Siman pasa, a trata den corte un caso di pornografia infantil, caminda e reaccion expresa den comunidad riba rednan social, tabata cu hues su castigo tabata demasiado poco, y cu nos ley ta demasiado suak pa atende e tipo di delito aki.

Bon Dia Aruba a trece e preocupacion aki cerca minister di Husticia, Siguridad y Integracion, Andin Bikker, kende a bisa cu nan ta trahando pa subi e castigonan contra e tipo di delito aki. E ta spera cu den di dos kwartaal di 2020, gobierno por adapta e codigo penal caminda e castigo maximo lo ta sumamente mas halto di locual ta actualmente.

El a bisa cu den luna di juli, prome Raad van Advies (RvA) a bay cu reces, gobierno a manda un concepto di ley cu a bay na e organo consultativo aki. Den e concepto aki -segun e mandatario- nan a propone di aumenta e castigo maximo pa delito contra abuso di menor.

RvA a manda su conseho, den cual nan a conseha gobierno pa aumenta tur e castigonan na e nivel cu Corsou y St. Maarten tin’e. Bikker ta haya inexplicabel cu e gobierno anterior a tene Aruba su castigonan riba delitonan contra abuso di menor na un nivel mas abou cu Corsou y St. Maarten. Kiermen substancialmente riba diferente caso, Aruba como unico compara cu Corsou y St. Maarten, a tene su castigo te hasta 4 aña mas abou cu e otro dos partnernan di Reino.

A base di e conseho di RvA, Bikker a anuncia cu lo bay hisa tur e castigonan contra abuso di menor, entre nan pornografia infantil, na e nivel ‘sumamente halto’ cu Corsou y St. Maarten tin’e. Nan ta den e proceso legislativo pa atende cu e consehonan duna pa RvA. Unabes cu nan lo bin cla, via Gobernador nan lo presenta e concepto di ley na Parlamento