Diahuebs awor, comunidad henter lo tin oportunidad pa participa den e acto di despedida y condolencia di kende ta wordo considera como Tata di Cultura, Juan Chabaya Lampe, miho conoci como ‘Padu del Caribe’.

E acto aki lo tuma luga riba Plaza Padu, un plaza cu a wordo construi patras di Bestuurskantoor y den pleno curason di Oranjestad pa duna tributo na Padu Lampe, kende recientemente a bay laga nos. Pero tambe na Rufo Wever y Hubert Booi pa nan aporte riba tereno cultural na Aruba y como co-autornan di nos Himno Nacional.

Na tres dia di e acto di despedida aki, e bunita plaza Padu Lampe, no tin niun bandera halfstok. Tampoco no tin un borchi cu por identifica e plaza mes y a lo menos duna un relato biografico di Padu. Tampoco e no tin suficiente iluminacion den oranan di anochi, y no tin tentnan pa duna sombra dura dia. E ta un plaza practicamente den olvido, eventualmente pa motibo politico, ya cu el a wordo construi durante gobernacion anterior. Bon Dia Aruba a referi varios biaha riba e echo aki, pero te ainda nada a wordo haci.

Ayera mainta, parlamentario di MEP, Endy Croes a expresa su palabra di condolencia pa henter famia di Padu, y a pesar cu e no ta forma parti di e comision di infrastructura di Parlamento, tambe e ta haya cu e plaza aki ta merece su debido atencion. Bon Dia Aruba a canalisa e situacion di e plasa aki y aunke e no ta miembro di e comision concerni, como parlamentario y representante di pueblo, e por atende e otro comisionnan den su cualidad di ‘toehoorder’ of observador.

E ta haya cu e ta un bunita plaza. Ademas tur centro di ciudad tin su tipo di plaza. Igualmente el a referi na e escultura riba e plaza inspira den un piano y e figuranan di e tres personahe destaca di nos cultura, entre nan Padu. Pero e ta haya cu ‘berdad lo por haci miho.’ Aunke nan a pone cierto luz cu e ta haya cu nan por ta mas bunita.

Croes a compromete pa hunto cu su fraccion lo trece na e minister encarga cu Infrastructura , Otmar Oduber, den combinacion cu e cartera di cultura lo por atende cu e situacion aki. E ta haya cu minister di Cultura, Xiomara Maduro, mester tin su envolvimento den embeyecemento di e plaza aki. E ta kere cu e dos mandatario aki lo por haci algo adicional pa e plaza aki.

Croes ta haya cu no solamente e cambio tin di haci cu embeyecemento di e plaza so, sino cu e ta kere cu mester trece mas bida riba e plaza aki. “Berdad e plaza t’ey, pero e no tin e bida cu nos ta kere cu e lo por tin.”

E ta haya cu lo por introduci un programa di henter un aña, ya sea 6 pa 8 biaha pa aña, unda por organisa cierto programa di indole cultural pa tene tambe e memoria di Padu na bida, awor cu el a bay laga nos. E ta kere cu e ta un forma pa siña na esunnan cu ta bin despues di nos, ken Padu tambe tabata ta.