Centro di Control y Prevencion di Malesa Contagioso di Merca (CDC) ayera a reitera un Orden di Sailing Condicional cu ta restringi crucero na Merca lo keda na vigor te november, den un aparente respuesta na un yamada di industria di crucero pa reanuda sailing e berano aki.

Segun un relato di Forbes, Cruise Lines International Association – cu ta representa mayoria di e companianan mas grandi di crucero na mundo – a haci un yamado pa CDC diaranson pa permiti cruceronan cuminsa sali di hafnan Mericano dia 1 di juli proximo. E grupo a argumenta cu e industria ‘a adopta un bar halto pa reanudacion’ mientras a nota cu esfuersonan di vacunacion por trece Merca ‘mas cera na normalidad’ pa comienso di juli.

Pero CDC a bisa den un declaracion diaranson atardi cu su Orden di Sailing Condicional lo keda na vigor te cu dia 1 di november, ya cu ‘detayenan pa e proximo fase di e orden actualmente ta bao revision interagencia’, segun Forbes a reporta.

Cruise Lines International Association a expresa frustracion cu CDC no a publica ningun guia adicional riba sailing desde cu a duna e orden na october.

Despues di declaracion di CDC pa 2pm, inversionistanan a dump accionnan di e tres compania grandi di crucero – Carnival, Royal Caribbean y Norwegian Cruise Line – cu accionnan cerando e sesion 1.9% te 4.9%.

Segun Forbes, ainda no a keda cla si lo permiti crucero pa reanuda prome cu e Orden di Sailing Condicional caduca na november.

No tin impacto pa Aruba
 Dialuna ultimo, minister di Salubridad Publico, Deporte y Turismo, Dangui Oduber a anuncia cu Aruba ta preparando pa cuminsa ricibi crucero dia 1 di juni proximo. “Despues di varios luna di combersacionnan cu e lineanan crucero tocante protocolnan, kico ta e protocolnan di mas safe, di mas sigur, kico ta e fechanan cu nan mes ta premira cu nan por cuminsa nabega back, kico ta e fechanan cu Aruba mes ta premira como pais cu nos lo ta cla pa ricibi barconan crucero back, mi ta kere a yega e momento cu awe nos por anuncia cu e prome siman di juni Aruba ta bay ricibi e prome crucero”, Oduber a comenta. Oduber a indica cu e prome crucero cu ta bay yega back Aruba ta trata di Celebrity Cruise Line, un linea di Royal Caribbean Cruise Line.

Bon Dia Aruba a tuma contacto cu Jurne Dabian, relacionista publico di minister Oduber, y a puntra si e declaracion di CDC tin impacto riba e anuncio di reanudacion di turismo na juni. Dabian a indica cu ministerio di Turismo ta na altura di e declaracionnan di CDC. Sinembargo, el a indica cu e cruceronan cu a keda anuncia pa Oduber dialuna ultimo ‘no lo ta saliendo for di Merca, sino di otro destinacion’. Esaki ta nifica cu nan no ta afecta pa e prohibicion di saling di CDC Mericano.

Mirando e desaroyo aki no tin efecto riba e plan di reanuda turismo di crucero na juni, ‘minister Oduber ta keda para tras di locual a wordo treci dilanti den e conferencia di prensa di dialuna’, Dabian a finalisa.