Kim Kardashian West, Katy Perry, Leonardo DiCaprio y otro celebridadnan a participa den un ‘freeze’ di Instagram pa 24 ora ayera, pa protesta loke nan a bisa ta e fayo di su compania mama, Facebook, pa combati contenido violento, odioso, y desinformacion di eleccion.

Streanan di Hollywood y influencers ta dunando nan sosten na e campaña mas recien di e movemento ‘#StopHateForProfit’ (stop odio pa ganashi). E movemento ta pidi hende pa pone un mensahe resaltando loke nan a bisa ta e daño cu Facebook ta haci, y fuera di esey keda sin post riba Instagram pa un dia.

“Mi no por para na banda y keda keto mientras e plataformanan aki ta sigui permiti e transmision di odio, propaganda y desinformacion – crea pa gruponan pa sembra division y parti Merca apart – djis pa tuma stapnan despues cu hende ta wordo mata”, Kardashian West a post riba su cuenta di Instagram diamars.

Facebook a nenga di duna comentario, pero a mustra riba anuncionan recien tocante kico e compania ta haciendo pa limita e alcance riba su plataforma di gruponan cu ta sostene violencia y su esfuersonan pa protege eleccion Mericano na november.

Cu 188 miyon siguido, Kardashian West ta un di e hendenan mas influyente riba Instagram y sosten di dje y otro nombernan importante pa e boycott a mira accionnan di Facebook cay den aftermarket trading pa diamars anochi. Nan a cay 1.7% prome cu e apertura di e mercado diaranson.

E organisadornan tras di e ‘#StopHateForProfit’, incluyendo gruponan di derechonan civil manera e Liga Anti-Difamacion, NAACP y Color of Change, anteriormente a lidera un campaña cu a pone centenares di marca y nonprofit pa join un boycott di aviso comercial contra Facebook na juli.

Ashton Kutcher, Mark Ruffalo, Kerry Washington, Rosario Dawson, Jamie Foxx y Sacha Baron Cohen tabata entre alrededor di dos decena di strea di Hollywoord y celebridadnan influencer sosteniendo e campaña, segun organisadornan.

DiCaprio a bisa cu e tabata para cu e grupo di derechonan civil pa yama ‘tur usuario di Instagram y Facebook pa protesta e amplificacion di odio, racismo y e debilitacion di democracia riba e plataformanan aki’.

Facebook, cu a gana casi $70 biyon den ganashi di aviso aña pasa, ta enfrentando un accion contra loke criticonan ta yama excuus indefensibel pa amplifica division, odio y desinformacion riba nan plataforma.

“Rapidamente nos ta yegando na un di e eleccionnan mas consecuente den historia di Merca”, e organisadornan a bisa. “E ‘cambionan’ vago di Facebook ta fayando peligrosamente di loke ta necesario pa protege nos democracia.”

E movemento tambe a destaca pa critica e maneho di Facebook di material online prome cu e tiramentonan na Kenosha, Wisconsin luna pasa. CEO Mark Zuckerberg a yega di bisa cu e compania a haci un eror di no elimina mas rapido un pagina perteneciendo na un grupo militante cu a haci un yamado pa ciudadanonan civil arma drenta e ciudad. A elimina e pagina solamente despues cu un adolescente arma a mata dos persona despues di protestanan violento impulsa pa e tiramento di Jacob Blake na man di polis.