Diadomingo anochi na e crusada di Koningstraat y Weststraat altura di refresqueria mayor a sucede un accidente di auto basta duro despues cu un auto luz paga a dal riba auto di polis. E patruyanan envolvi a solicita yudansa y ambulance cu unidad di bombero cu urgencia debi cu e chauffeur di e otro auto ta herida y no ta reacciona. Mas patruya a presenta pa asina cera e area y unidad di rescate di bombero y ambulancenan a yega inmediatamente. A cuminsa traha cu e victima herida pero e tabata for di tino posibelmente alcohol a hunga un rol tambe. Unidad di bombero a corta full e auto pa asina personal di ambulance saca e victima por completo sin ningun problema. Specialista di trafico a presenta pa haci investigacion, y Alto Comisario di Cuerpo Policial tambe a yega na e sitio pa mira e situacion con na e mes un crusada den menos cu un siman auto ta dal riba auto di polis.
