Partido POR (Pueblo Orguyoso y Respeta) a wordo funda oficialmente diadomingo mainta den presencia un sala den Cas di Cultura yen cu sostenedonan. Tambe a introduci Ronny Maduro como e di cuater candidato riba e lista.
Durante e mainta aki a introduci algun candidato cu lo aparece riba e lista di e partido POR pa eleccion di otro aña. Entre nan, lider di partido Otmar Oduber, tambe Andin Bikker kende a wordo introduci pa Dello Gomez.
Tambe a presenta e candidatanan cu a wordo nombra siman pasa. Renato van Putten a presenta Jacqueline van Putten como otro candidato. Joselin Croes a wordo presenta pa Stephen Daal y Michella Steenvoorde-Laclé pa Diana Croes. Ronny Maduro a wordo introduci como e candidato di mas nobo di e partido. Aunke tabata e intencion prome, Dilma Arends Geerman no a wordo introduci diadomingo ainda.
Durante Otmar Oduber su discurso, el a gradici tur cu a uni na “E Forsa Nobo” y a bisa tur cu e partido tin di ofrece pueblo di Aruba, entro otro el a menciona politica diferente, transparente, progresista, envolviendo pueblo y promoviendo hubentud.
Pa culmina e tanto Otmar Oduber como Andin Bikker a firma e documento den presencia di notario Ralph Yarzagaray, kende a funda e plataforma politico Pueblo Orguyoso y Respeta oficialmente.
Discurso Otmar
Den su discurso durante e mainta aki, sr. Oduber ta bisa: “Awe sigur no ta un dia manera cualkier otro. Awe ta un dia historico cu lo keda graba pa semper den nos memoria y den mente di nos futuro generacionnan. Loke a trece nos hunto awe ta e stimacion enorme pa nos pida dushi baranca y un deseo pa innova, renoba y transforma nos pais den un miho Aruba a trece nos hunto.”
Di su banda Andin a bisa den su discurso cu pa realmente logra e metanan pa traha pa Aruba y realisa plannan y visionnan, mester traha uni, mester bin cu union pa asina logra yega na gobernacion pa ehecuta esakinan.
