Na momento cu Jose Andres a yega New York pa prome biaha, e marinier den marina Spaño a mara boto na West 30th Street yen di ambicion. Decadanan despues, e chef ganado di varios premio tin un ‘food hall’ riba e caya aki, y lo sirbi 40mil cuminda e siman aki a traves di e ciudad unda el a construi su soñonan, cu awo ta den epicentro di coronavirus na Merca.
Andres, kende su restaurantnan na Merca ta inclui The Bazaar, Jaleo y Somni (cu dos strea Michelin), a funda World Central Kitchen na 2010. Esaki a sirbi mas di 15 miyon plato mundialmente despues di horcan, candela y otro desaster.
Desde e pandemia, su organisacion a sirbi mas di 750 plato for di Miami y Los Angeles te na Little Rock, Arkansas y Fairfax, Virginia. E ta traha for di luganan manera biblioteca, truck di cuminda y restaurant cera, alimentando 125 hospital, studiantenan di programa di lunch escolar, y hasta pasaheronan di crucero den cuarentena.
Andres a crea un red rond mundo, dependiendo di amigonan chef famoso incluyendo Rachel Ray, Guy Fieri y Marcus Samuelsson pa alimenta esunnan cu hamber y yuda tene na flote e cushinanan di restaurant na Merca, unda hopi a cuminsa nan carera.
“Mi tin un debe cu Merca… esey ta lo miho cu mi por duna Merca, pasobra Merca a duna mi un hogar. Merca a duna mi oportunidad”, Andres a bisa AP den un entrevista recien via telefon.
Na New York City, el a set up un café pa sirbi e hospital Mount Sinai na Central Park. Na Harlem, e ta usando e restaurant Red Roosted, di hues di programa di television ‘Chopped’, Samuelsson, pa alimenta famianan.
Restaurant di Samuelsson na Miami no a habri su portanan ainda, pero na luga di laga esaki bashi, el a entreg’e na World Central Kitchen. Nan ta sirbiendo sandwich y salada eynan na trahadonan di hospitalidad cu a perde trabou, residente sin hogar, y chauffeurnan di Uber.
Hasta den crisis, e top chefnan aki no ta sirbi aros blanco. Cuminda recien na centronan di anciano na Washington D.C. a inclui pasta cremoso di tomati cu berdura, y aros cu cilantro chickpea y spinazie, compaña pa citrus vinaigrette y tortilla.
Andres tabata entre e prome pa cera su restaurantnan na Spaña, cu speransa pa crea un guia pa chefnan rond mundo riba con pa usa nan restaurantnan y tene empleadonan na trabou mientras ta alimenta hende cu hamber.
“E operacion aki ta crece cada dia”, el a bisa. “Nos kier pone Merca na trabou den proceso di alimenta Merca.
Na California, Fieri ta warda, cla cu un cushina di rescate y un team di sosten. “Guy ta cla pa bay”, Andres a bisa. “Esaki ta manera guera. Mester tin tropa cla pa accion.”
Fieri a compara su largo amistad cu Andres y otro chef famoso como ‘toca den un banda’. “Ora bo ta comparti cu hende generoso y filantropico manera Jose Andres, tur loke bo kier haci ta mas grandi, miho”, Fieri a bisa, kende a cushina banda di Andres durante e candela aña pasa na
Den prome dianan di e brote, Fieri, anfitrion di e programa di television ‘Diners, Drive-Ins and Dives’ tambe kier a haci mas. El a cumpra $50mil den gift cards pa yuda restaurantnan local. El a manda decenas di video personalisa na CEO di companianan grandi di cuminda pa pidi donacion.
Su Fondo pa Alivio di Empleado di Restaurant rapidamente a recauda $10 miyon, cu meta di recauda $100 miyon, pa ofrece donacion di $500 na trahadonan cu a perde trabou. Siman pasa a entrega e prome cheque.
Ray a anuncia un donacion di $4 miyon diamars di su dos instancia caritativo. Mita lo bay pa programa di nutricion y alimentacion, incluyendo World Central Kitchen. E otro mita lo sostene programanan di rescate animal, alimentacion y veterinario. “Nos no ta un fondo di alivio pa desaster den nos origen of deseo, pero honestamente den esey nos a converti den ultimo añanan”, el a bisa AP.
Organisacion di Andres ta un di e recipientenan mas grandi. “E ta djis eynan henter ora rond henter mundo y mi stima Jose. Mi tin asina un devocion na dje”, Ray a bisa for di su cas na New York.
Na Minnesota, chef Andrew Zimmern tabata entre e prome pa cera su restaurant, temiendo pa siguridad di su trahadonan. Despues, el a pone hunto e Coalicion di Restaurant Independiente, contratando lobbyist pa ta un voz na Washington pa restaurant, specialmente restaurant di famia. El a nota cu restaurantnan asina ta hopi hende nan prome trabou, como adolescente, y ta e dunado di trabou top pa mama soltero y persona cu a caba di sali di prison.
“Nos no por faya. (Restaurant) mester keda habri y cla pa ricibi nan trahadonan bek”, Zimmern a bisa. “Si nos no por haci esey, lo ta un catastrofe economico, humanitario y cultural.”
