E hopi recorda Roberto Gomez Bolaños, Chespirito, ken a fayece na november 2014, finalmente lo tin su propio serie biografica, cu lo ser transmiti na 2021.
Tania Benitez, un di e productornan di e proyecto, a confirma na medionan Mexicano cu e proyecto na avansa y cu ta den etapa di pre-produccion. “E aislamento a permiti nos explora y mira kico nos kier crea”, el a afirma.
E ficcion lo ta apoya riba e autobiografia ‘Sin querer queriendo’, publica na 2006. E produccion lo ta a cargo di THR3 Media Group, di cual Benitez ta forma parti, y Grupo Chespirito, e compania di e yiu di e comediante.
Di su banda, den otro oportunidad, Gomez Fernandez a bisa cu e tabata kier pa entre e actornan di e obra tabata Maria Antonieta de las NIeves, kende a interpreta Chilindrina pa varios aña den El Chavo del Ocho, ya cu su tata tabata stim’e hopi.
Cu personahenan di Chespirito, varios generacion a lanta na henter Latino America cu ainda ta recorda e frasenan di e serie, manera: “Es que no me tienen paciencia”, “Bueno pero no te enojes”, “Al cabo que ni quería” o “Fue sin querer queriendo”, manera su biografia a keda batisa.
Tata di seis yiu di su matrimonio cu Graciela Fernandez, ademas di su gran trabou, e artista tambe a resalta pa cuestionnan personal y scandal. Fin di añanan 1970 el a cuminsa su relacion cu Florinda Meza, ken tabata su muhe te su ultimo dia y cu ken el a casa despues di biba hunto 27 aña. Sinembargo, e amor aki a trece problema den elenco, ya cu e tabata ex-pareha di Carlos ‘Kiko’ Villagran.
Dia 28 di november 2014, Chespirito a fayece na Cancun despues di problema di curason. E no t’ey fisicamente, pero ta sigui biba a traves di su legado, cu ta continua haya fanatico den muchanan di henter America.
