Home Regional Chile: Prome pais na Sur America cu ta prohibi e uzo di...

Chile: Prome pais na Sur America cu ta prohibi e uzo di saco di plastic

197

(LaPatilla/PictureAlliance) – E president Sebastian Piñera a decreta diabierna ultimo un ley cu ta prohibi entrega di saco di plastic na henter comercio di Chile, convertiendo nan na e prome pais cu ta adopta e legislacion estricto aki na Sur America.

Asina Chile ta agrega su mes na e cantidad di paisnan na  mundo cu a tuma medida pa reduci  contaminacion, cu ta produci 10 miyon di saco di plastic pa minuut. Desde diabierna pasa e fecha di adaptacion a yega, e comercio di Chile lo por entrega un maximo di dos saco di plastic pa compra di cada consumidor, e texto di e ley ta bisa. “Nos por biba sin nan, nos por biba sin saco di plastic” , Juan Alberto Urbina, hefe di un tienda di sapato na Centro di Santiago a expresa.

E dia cu e fecha yega, e prohibicion lo ta bay ta total pa supermercado, botica, y otro luganan comercial, mientras cu na tienda chikito of den bario, e norma nobo aki lo bay drenta na vigor den e proximo dos aña despues di e publicacion di e ley. Den e legislacion ta exclui e foam box nan ‘cu ta necesario pa rason di higiena of pa motibo cu pa medio di su uzo por preveni e desperdicio di alimento’. Den e ley tin estableci un multa di  370 dollar pa cada saco di plastic pa cualkier persona cu viola e ley den cualkier forma, ya segun datonan di gobierno ta produci 3.200 miyon di saco di plastic pa aña.

“Un saco di plastic ta tuma un par di seconde pa produci, ta wordo uza menos di 30 minuut di e supermercado pa e cas, y despues e ta tarda 400 aña pa keda elimina. Es decir, pa algun minuut, naturalesa ta sufri e efecto di e saco di plastic pa mas di 400 aña”, Piñera a bisa.

Tambe nan tin cu busca otro forma pa contene e sushi di casnan. E mayoria nan awendia ta envolvi cu saco cu nan ta haya na supermercado. Un practica ‘no mucho apropia’, pasobra nan ta kibra cu hopi facilidad y no ta cumpli cu e funcion di hiba e sushi pa un landfill, e ministro di medio ambiente, Marcela Cubillos a bisa. “Na Chile e 4% so di e 17,5 miyon di su habitantenan ta recicla.”

E iniciativa di Chile, ta e prome pais di Sur America cu a implementa e ley aki segun e agencia di ONU di medio ambiente ‘Audaz Medida contra e saco di plastic’. Ademas di Chile, Colombia ta aplica un impuesto desde un aña pasa pa saco y Panama tambe a aproba na januari pasa un prohibicion total na tur su comercio, aunke a duna nan mas tempo (18 luna) pa e ciudadano por adapta na e ley aki.