Home Editorial Upgrader di Citgo no ta birando realidad

Upgrader di Citgo no ta birando realidad

212

Awor cu e acuerdonan cu Valero y Citgo Aruba a haci dos aña caba, y gobierno por conta mes cu algo lo bay sucede. Dia pa dia mas e situacion ta birando dificil cerca e empresa madre na Venezuela, mientras cu na Aruba ta reina un silencio. De bes en cuando ta mira algun actividad, pero nada mayor, manera nan mes a anuncia. Cu esey nada ta sucede tampoco cu Aruba su economia, mientras nos mester sikiera algo di crecemento economico. Nos ta pendiente di e posibel yegada di e fast ferry, pero esey ta un servicio cu ta genera divisa si e ta establece na Aruba y ta emplea mayoria personal di Aruba. Asina mes e no lo ta un actividad cu ta genera empleo y ganashi na nivel di un refineria, pero esey no ta motibo pa purba realisa esaki.

Mientras tanto e proyecto petrolero nobo a keda colga den bashi. Kico ta e aspectonan pa tuma na cuenta den e situacion actual, pa por evalua lo por ta e siguiente pasonan? Aki ta importante e situacion financiero/operacional di Pdvsa y su sucursalnan, e situacion economico y politico general na Venezuela, y e situacion riba mercado mundial di petroleo. Pa cuminsa cu e contexto di e empresa madre y su subsidiarionan; por bisa cu no por bisa nada otro cu nan ta rumbo pa un abismo. Nan no tin ningun posibilidad pa scapa ni nan mes, te pa scapa e proyecto na Aruba. Mientras tanto, gobierno ta keda menciona e compania Mericano, Citgo Petroleum Corporation como nan partner den e deal aki, mientras e compania mes a emiti, un dia despues di e acuerdo firma dia 10 di juni 2016 na Caracas den un comunicado di prensa, cu nan ta solamente participa cu asistencia tecnico den e proyecto di rehabilitacion. Cu enfasis nan a bisa tambe cu financiamento pa e proyecto lo mester keda regla externamente. Pa colmo, e empresa Mericano mes ta birando victima di e politica destructivo di Caracas, unda proximamente Pdvsa (y gobierno Venezolano) por hasta perde e propiedad aki na man di tenedonan di bono cu no ta hayando ni interes ni capital di Pdvsa.

Henter mundo petrolero ta pendiente di e collapse total di Pdvsa y su holding nan subsidiario. Kico ta causa e situacion aki? En corto, e hecho cu estado Venezolano a chica e companianan di tal manera cu nan no a keda cu recurso pa financia nan mes pa loke ta mantenemento, ni inversion nobo. Cu consecuencia cu produccion a mengua, poniendo mas presion ainda riba e compania. Ironicamente ta e collapse di e demanda interno pa producto petrolero a haci cu te awor Pdvsa por a mantene cierto nivel di exportacion. Di otro banda, cu un dependencia di 94% di nan exportacion riba petroleo, ni e subida di prijs mundial di crudo a yuda e compania y e pais.

Falta di mantenemento, producto di atraso gigantesco den pago di proveedornan (internacional) di servicio ta limitando produccion. Riba tur esey, e problemanan reciente cu suministro di electricidad a caba di daña e perspectivanan pa mehora produccion. Tambe problemanan tecnico na e waf principal Jose, pa exportacion di crudo y pa importacion di nafta y crudo liviano, a haci cu actualmente produccion di crudo ta na apenas 1,3 miyon bari pa dia, mientras cu aña pasa ainda esaki tabata na 2 miyon bari pa dia. E perdida di almacenamento na e islanan den Caribe a caba di seya destino di e consorcio. Ta anticipa cu pa fin di aña produccion por ta na 1 miyon bari of menos, loke ta insuficiente pa paga e financiadonan principal di China y Rusia, y pa propio uzo, y pa bende pa haya divisa…

Nos kier señala aki cu Venezuela y Pdvsa nan problema na 2018 no ta si nan ta habri algo na Aruba of no. Nan problema ta awor pa mantene cabes riba awa, buscando refinanciamento di debe di Pdvsa, ademas di e debenan di e pais mes, cu tambe ta keda sin paga. Den e situacion di crisis aki ta dificil pa imagina cu e pais of e compania por yega na financiamento. Citgo Aruba ta un simpel sucursal di Pdvsa, cu lo ta mes atractivo pa prestamo manera e compania madre.

Loke ta keda e pregunta ainda, ta cual di dos ta cay prome: e pais mes o Pdvsa. Cu esaki, e storia no a caba ainda, pasobra nos, manera otro teritorio den Caribe, cu a haya bishita caba di oportunistanan di sector financiero aventurista cu no tin e conocemento di e companianan di petroleo grandi, y ademas no tin acceso na petroleo propio y lo mester opera cu compra di crudo riba mercado liber. Realmente mester ta hopi critico pa e tipo di aventurero aki, cu ta kere cu nan por opera unda e companianan lider di e sector a opta pa no haci esaki. Nos tin e ehemplonan reciente di Bahamas y di St. Croix cu ta den proposicion bastante riesgoso cu companianan cu ta bay dal nan prome pasonan den e mundo di petroleo. Aruba no mester pensa mes di bay den e direccion ey.