Reguladonan Chines a duna orden pa Ant Group, e compania di tecnologia financiero mas grandi di mundo, rectifica su negoshinan y cumpli cu rekisitonan regulatorio entre cada bes mas scrutinio di practicanan anti-monopolio den sector internet di e pais.

Banco Popular di China, e banco central di e pais, a manda yama ehecutivonan di Ant Group diasabra y a duna orden pa nan formula un plan di rectificacion y un cronograma di implementacion di su negoshi, incluyendo su servicionan di credito, seguro y maneho di bienes, e reguladonan a bisa den un declaracion diadomingo.

E declaracion a bisa cu Ant Group falta un mecanismo di bon gobernacion, a desafia rekisitonan di cumplimento regulatorio, y a participa den arbitrahe regulatorio. Tambe a bisa cu e compania a usa su posicion di mercado pa exclui rivalnan y daña e derecho- y interesnan di consumidornan.

E reunion a bin despues cu luna pasa, reguladonan Chines a stop e debut di $37 biyon den stock di Ant na Shanghai y Hong Kong riba cambionan regulatorio, y ta yega apenas algun dia despues cu China a anuncia su investigacion anti-monopolio di e gigante di comercio cibernetico Alibaba Group, cu ta doño di un accion di 33% den Ant Group.

E ordennan di reguladonan por limita e expansion di Ant Group y lansa su negoshinan financiero lucrativo den desorden.

Ant Group, cu a cuminsa como un servicio di pago pa e plataforma di comercio cibernetico di Alibaba, Taobao, desde e tempo ey a expande pa ofrece productonan di seguro y inversion na su centenarnan di miyones di usuario na China continental. Jack Ma, fundado di tanto Alibaba como Ant Group, ta un di e entrepreneurnan mas rico y prominente di China.

Reguladonan a duna Ant Group orden pa establece un compania holding financiero y tene suficiente capital. Tambe a bisa cu Ant Group mester bolbe na su origen di pago, mehora transparencia rond di transaccionnan, y prohibi competencia inhusto, mientras ta mehora maneho corporativo y ta sigura cu ta cumpli cu rekisitonan regulatorio pa su negoshinan.

Ant Group a bisa den un declaracion diadomingo cu ta cumpli cu rekisitonan regulatorio y mehora maneho di riesgo y control, y cu mester set up un working group pa haci e rectificacionnan necesario.

“Nos ta aprecia e guia y ayudo di e reguladonan financiero”, e declaracion a bisa. “E rectificacion ta un oportunidad pa Ant Group reforsa e fundacion di nos negoshi pa crece cu cumplimento completo, y sigui enfoca riba innovacion pa bienestar social y sirbi negoshinan chikito.”

E scrutinio di Ant Group y Alibaba ta bin mientras China ta examina di cerca e influencia di e sector internet di e pais.

Luna pasa, China a lansa propuestanan di regulacion pa combati practicanan anti-competencia den e industria, manera firma acuerdonan exclusivo cu bendedonan y e uso di subsidio pa elimina competidornan.

Alibaba y un compania cu a spin off di Tencent Holding Ltd. a ricibi boet e luna aki pa no aplica pa aprobacion oficial prome cu procede cu algun adkisicion.

Siman pasa, reguladonan a reuni cu ehecutivonan di Alibaba y cinco otro compania di internet mayor di China, y a adverti nan pa no abusa di nan dominio pa elimina competidornan door di uso di contractnan exclusivo, prijs predatorio y otro tactica, segun un declaracion di Administracion Estatal di Regulacion di Mercado.