‘Chip digital y violacion contra privacidad di hende’

E anuncio cu minister di husticia, Andin Bikker (POR) a haci pa introduci un chip incorpora cu e plachi di e number di auto a cuminsa lanta algun reaccion mixto. Entre esunnan cu hunto cu e mandatario ta comparti e opinion cu un micro chip asina ta trece mas control y siguridad den e lucha contra criminalidad.

Di otro banda tin esunnan cu ta mira cu e tipo di instrumento aki como un violacion contra privacidad di hende, specialmente si e control aki ta cay den man di hendenan iresponsabel.

Ya caba parlamentario Michael Lampe (AVP) a vocifera su opinion riba e introduccion di un chip digital asina, sin cu gobierno por a haci un consulta prome y sin haci un investigacion previo. Mas bien e ta haya cu locual nan kier mustra ta di profila cu nan ta un gobierno innovativo y moderno. E parlamentario di oposicion ta considera cu e anuncio aki ta ‘un poco iresponsabel’.

E tipo di uzo di tipo di chip aki den otro paisnan a lanta un debate internacional particularmente riba tereno di invasion di privacidad di hende. Un chip asina ta produci diferente pregunta riba si e tin informacion di e persona ta leak bek cu belasting, etc.. Un di e preguntanan cu ta wordo lanta rond di e introduccion di algo asina ta, kico tin den e chip aki?

Kiermen si e tin incorpora pa ehempel un sistema di GPS of localisado den dje.
Pero tambe ken ta esun responsabel pa wak y cuida e privacidad di nos hendenan, y con sigur e ta pa nos hendenan. El a trece dilanti e discusion cu actualmente ta tumando luga riba e leakmento di informacion priva for di Facebook durante e campaña di eleccion di presidente Trump na Merca. E debate tin di haber kico ta sosode ora cu bo ta colecta data di hende.

E ta kere cu esaki ta cuestionamento cu minister Bikker mester bin dilanti pa atende cu nan di un forma responsabel. Pues e introduccion di un chip digital asina ta un tema cu e fraccion di oposicion lo keda pendiente di dje pa asina informa nos comunidad. Recientemente nan mes a haya algun curso basa riba con nan por deal of interpretacion di data colecta di diferente forma rond di nos isla.