Home Editorial Ki dia Setar ta bay Ministerio Publico?

Ki dia Setar ta bay Ministerio Publico?

276

E noticia grandi siman pasa tabata esun di e ex empleado di Setar NV, cu a ser permiti trankilamente pa bay biba na Merca, despues cu e compania mes a revela e sucesonan delincuente di e persona aki. Den esey tanto e empresa como e consumidor local a keda perhudica, ya cu e delincuente a ricibi soborno pa haci compra di material inferior na prijs exagera cerca cierto companianan na Merca, y como recompensa a ricibi soborno di e companianan stranhero aki.

Manera a resulta di e caso penal den corte na Merca, e acusado a admiti di a ricibi un suma di US$ 1,3 miyon y e acusacion na Merca tabata su intento di laba placa. Pero, pa bo laba placa bo mester a horta prome, toch? Labamento ta bin semper despues di e prome delito, pa bo por tin e placa ey. E condena na Merca ta relaciona cu violacion di e Foreign Corrupt Practices Act (FCPA), unda ta trata di actonan delictivo cometi pa companianan Mericano na prome luga, den nan relacion cu companianan den exterior.

Por ehemplo, e na Aruba tambe conoci Jose Roberto Rincon a keda acusa y condena pa violacion di e mesun ley aki. Ta trata aki primeramente di acusacion y condena di e partnernan Mericano di e delincuente Arubano, y den su caso e delito ta encera solamente labamento di placa. Pero, e partidonan perhudica den e caso aki, ta na Aruba. Y ta ken ta e partidonan perhudica? No ta Setar NV mes? Anto ainda nada no ta sucede? Nos ta corda bon e teatro cu director di Setar a desplega, hunto cu e ministro responsabel di e tempo ey pa Telecomunicacion, unda nan a insisti cu no ta haci denuncia. Hasta a ser bisa cu Ministerio Publico a bisa pa nan ‘bay bolbe ora nan tin prueba’…

Wel, si acaso tabata haya cu na e momento di e denuncia ey, no tabatin prueba, awor si tin. Tin henter un file di husticia Mericano unda e acusado a admiti cu ta a traves di engaño y perhuicio di su dunado di trabao el a logra haya e placa cu e companianan a paga su persona. Nos tin gana di tende awor, no di director di Setar NV so, sino tambe di e actual ministro encarga cu telecomunicacion, si ta bay tuma e pasonan necesario pa, eventualmente despues di e cumplimento di castigo na Merca, pa e persona keda entrega na autoridadnan hudicial na Aruba, pa e para responsabel pa e delitonan cometi na Aruba.

Den e asunto aki no ta trata solamente di yega na conoce tur e echonan pa loke ta e delincuente aki, pero tambe ta importante pa ainda tuma luga un investigacion mas amplio, pa comproba cu sigur no tabatin mas hende, den Setar o pafo, envolvi den e crimen aki. Si parti di e placa tabata core via un compania offshore na Panama, lo ta interesante pa no sa solamente ki compania a pone placa riba e cuenta bancario, sino mas interesante ainda ta ken eventualmente a beneficia di e fondonan deposita aya. Ta dificil pa kere, a primera bista cu esaki tabata un acto di un solo persona.

P’esey ta necesario pa autoridadnan hudicial haci nan trabao, y persigui esunnan envolvi den esaki; si resulta cu berdaderamente esaki tabata un one man job, ainda e lo mester haya su castigo. Claro cu den un eventual caso penal na Aruba, despues di sinta su castigo na Merca, lo tene debido cuenta cu e hecho cu el a haya castigo aya caba. Pero manera bisa anteriormente, e veredicto na Merca ta trata e caso di labamento di placa, no e crimen(nan) cometi na Aruba.

E motibo pa para fuerte den e caso aki ta cu, si no haci esey, ta creando e impresion cu bo por scapa di man di husticia, basta bo bay for di e luga aki. Tabata sumamente straño e actuacion di e anterior ministro encarga cu telecomunicacion, cu no kier a subi e caminda cu ta conduci na haci denuncia oficial. Ta kico tin di sconde anto? Na luga di crea algo di prestigio pa su mes, el a opta pa carga cu e sospecho cu tabatin algo mas serio y grandi ey bao. Semper lo keda mustra straño pa un mandatario nenga di cana e caminda normal, y den e caso aki esey ta laga e autoridadnan hudicial haci nan trabao. Pero por remedia tur esaki… Si aña pasa Setar NV tabata opina cu Ministerio Publico a bisa nan pa nan bay bolbe, anto awor nan tin prueba palpabel, esta declaracion den corte na Merca di e sospechoso mes, cu ta via e estafa na Setar NV el a haya e placa cu el a bay laba.

Di mes, e storia aki no a caba, pa un motibo hopi importante y di principio: laga e crimen aki, cometi aki na Aruba, den nos cara, sin procesa y castiga, ta duna un mal señal na henter comunidad. Na esunnan cu ta haci malo, cu nan por sali sin ricibi castigo. Na e resto di ciudadano cu ta respeta ley, e señal ta cu tin dos standard di husticia riba e isla aki.