(scitechdaily) – Perspectiva publica den The American Journal of Clinical Nutrition ta argumenta cu e raiz di e pandemia di obesidad ta relaciona na kico nos ta come na luga di con hopi.

Estadisticanan di CDC na Merca ta mustra cu obesidad ta afecta mas di 40% di adulto Mericano, poniendo nan den mayor riesgo pa malesa di curason, diabetes tipo 2 y cierto tipo di cancer. E guia dietetico di USDA pa Mericanonan 2020-2025 ta bisa cu baha peso ta ‘rekeri pa adultonan reduci e cantidad di caloria cu ta tuma di cuminda y bebida y aumenta e cantidad gasta mediante actividad fisico’.

Pero a pesar di decadas di mensahe di salubridad publico pa hende come menos y haci mas ehercicio, e tasa di obesidad y malesanan relaciona ta keda aumenta.

 

Autornan di ‘Modelo Carbohidrato-Insulina: Un perspectiva fisiologico di Pandemia di Obesidad’, publica den American Journal of Clinical Nutrition, ta punta riba fayonan fundamental den e modelo di balans di energia, argumentando cu un modelo alternativo, esun di carbohidrato-insulina, ta miho pa splica aumento di peso y obesidad. Es mas, e modelo aki ta punta na strategianan mas efectivo y duradero pa maneho di peso.

Segun autor lider, Dr. David Ludwing, endocrinologo na Boston Children’s Hospital y profesor di scol medico na Harvard, e modelo di balans di energia no ta yuda nos compronde e causanan biologico di aumento di peso: “Durante crecemento, por ehemplo, adolescentenan por aumenta consumo di cuminda cu mil caloria pa dia. Pero nan comemento di mas ta causa e crecemento, of e crecemento ta pone nan haya hamber y come mas?”

Den contrast cu e modelo di balans di energia, e modelo carbohidrato-insulina ta declara cu come di mas no ta e causa principal di obesidad. Sino cu ta pone e culpa riba patronchinan di alimentacion moderno caracterisa pa exceso di consumo di cuminda cu carga glycemico halto: en particular, carbohidrato procesa cu ta digeri rapidamente. E cumindanan aki ta causa respuestanan hormonal cu fundamentalmente ta cambia nos metabolismo, impulsando pa warda vet, aumento di peso y obesidad.

Pa compronde pandemia di obesidad, mester considera con e cuminda cu ta come ta afecta hormoon y metabolismo.

Mientras e modelo carbohidrato-insulina no ta nobo, e perspectiva di e autornan ta e formulacion mas comprensivo di e modelo aki te awo, skirbi pa un team di 17 cientifico, investigador clinico y experto di salud mental internacionalmente reconoci. Colectivamente nan a resumi e evidencia sosteniendo e modelo carbohidrato-insulina. Es mas, e autornan a identifica un serie di hipotesis cu ta distingue e dos modelonan pa guia investigacion den futuro.

Adopcion di e modelo carbohidrato-insulina na luga di e modelo di balans di energia tin implicacion radical pa maneho di peso y tratamento pa obesidad. Na luga di urgi pa hende come menos, cu no ta traha a largo plaso, ta suferi un caminda enfoca mas riba kico ta come. Segun Dr. Ludwig, ‘reduci consumo di e carbohidratonan di digestion rapido ta reduci e impulso pa warda vet den curpa. Como resultado, hende por baha peso cu menos dificultad’.

E autornan ta reconoce cu mester mas investigacion pa test ambos modelo conclusivamente.