editorial 2_15_1.jpg
CAFT a haya otro informacion…
 
Sorpresa grandi nos a haya ora vocero di Servicio di Impuesto ta anuncia cu como 62% di tur automobilista y otro conductor di vehiculo no tin henter aña 2016 di ‘motorrijtuigenbelasting’ paga. Por ta cu nan tin henter aña pa paga ainda, o nan a paga un parti so. E noticia aki a percura pa un ola di comentario den tur medio di comunicacion. Y ta laga nos cu e impresion cu e aña aki nos conciudadanonan ta mal pagado di berdad! Esey ta asina? 
 
Nos tin nos duda, y e miho manera pa kita duda ta busca cifra, estadistica, con cu bo kier yam’e. Y unda nos por acudi pa esey? Nos por cuminsa cu e informe encuanto e tercer trimester di 2016, unda gobierno a base di e ley di CAFT mester duna cuenta di su ‘que hacer financiero’. E informacionnan aki tin hopi informacion detaya aden cu normalmente nos no ta haya pa mira, o cu un retraso hopi grandi. Pero awor cu e rapport aki obligatoriamente ta bay pa parlamento, nos tin un tiki mas transparencia. Y kico e informe ta bisa? 
 
Riba pagina 11 di e documentonan aki nos ta mira cu te na september 2016 a drenta un total di Afl. 19.685.633,- mientras cu na 2015 den mesun periodo a drenta Afl. 17.396.443,-. Pa e aña aki ta anticipa un suma total di Afl. 22.300.000,- den e categoria di impuesto aki. Y cuanto a paga na aña 2015? Segun cifranan di Banco Central a drenta Afl. 20,3 miyon, cu e anotacion cu esaki no ta e cifra final riba ‘transactiebasis’, pues e suma final berdadero por ta un poco mas halto. 
 
En todo caso, na fin di kwartaal 3 di 2015 tabata falta ainda alrededor di Afl. 3 miyon pa drenta. E aña aki falta Afl. 2,6 miyon pa drenta ainda… Anto di unda tanto panico, si falta solamente 11,7% di e total anticipa pa drenta? Ademas cu na tur fin di aña ta keda un restante cu ta cobra den e aña(nan) siguiente; den bida real nunca bo ta logra cobra 100% den e mesun aña, esey nos tur sa.
 
Awor ta surgi un pregunta interesante: con por ta cu 62% di tur propietario di vehiculo no a paga o a paga parcialmente nan impuesto y e suma cu a drenta e aña aki den nuebe luna ta casi mes halto cu loke a drenta na 2015 den henter aña? E informacion duna pa vocero di Servicio di Impuesto mes ta bisa cu e incumplimento lo tabata 30% aña pasa y e aña aki lo ta 62%?! Con cu bo kier mir’e, aki tin algo cu no ta cuadra: sea e informacion divulga ayera no ta corecto, o e informacion elabora pa CAFT no ta cuadra! Ban purba averigua kico por ta e caso.
 
Opcion 1: e informacion duna ayera ta corecto. E ora anto un suma desconoci mester drenta ainda. Nos no sa cuanto persona tin henter aña pa paga ainda, cuanto tin mita o solamente ultimo kwartaal pa paga. Pero si cu 30% di incumplimento na september 2015 a drenta caba como 85-86% di e total pa fin di aña, anto awor ta bisa CAFT cu a cobra 88,3% te cu september, con nos por tin 62% di incumplimento, aunke cu e ta parcial. Ni cu henter e grupo cu debe ainda, debe e ultimo tres luna so, e no ta cuadra.
 
Opcion 2: e informacion duna na CAFT ta corecto. Anto no tin motibo pa panico, pasobra e cumplimento ta mas o menos mescos, o hasta un tiki miho cu aña pasa. Algun informacion adicional: Banco Central a haya di Servicio di Impuesto como entrada riba kwartaal 1 y 2 di 2016 un total di Afl. 17,4 miyon (14, 8 y 2,6 miyon respectivamente) loke a keda publica algun tempo pasa caba. Si awor ta bisa cu den kwartaal 3 a bin 2,2 miyon florin acerca, esey ta creibel, mirando e forma con e impuesto ta drenta, cu gran mayoria semper den prome kwartaal di aña.
 
E pregunta ta e ora, ta kico a sucede cu e vocero di Impuesto ta bin afo cu un storia asina aleha di realidad? Ken e elabora e cifranan aki, ken a autorisa pa esakinan keda publica, y mas interesante ainda, cu ki proposito? Pa haya mas hende core bin paga loke nan debe? Pa gobierno pa fin di aña tin mas cash den cas? Of pasobra e cobransanan di BBO y impuesto di importacion ta kedando atras asina hopi cu awor tin problema di cash flow?
 
Como bon ciudadano di mes caba nos ta spera cu e prome opcion ta incorecto. Pakico? Pasobra nos no por kere cu den un asunto asina serio manera duna cuenta financiero como pais, frente di un instancia imponi pa Reino, lo por tin engaño den wega. Na esnan responsabel anto e tarea pa investiga pakico e asunto aki a bin den publicidad di e manera aki. Pasobra si e panico tabata innecesario, ta mas innecesario ainda di tilda gran parti di Aruba di ta mal pagado. Palabra ta na nos autoridadnan.

LEAVE A REPLY

Please enter your comment!
Please enter your name here