Cinco departamento di Colombia tin daño, pa motibo di hopi deslisamento di tera cu a sucede despues di e yobida fuerte, cu awor ta haci dificil e trafico riba varios caminda, specialmente fin di siman aki cu tabata dianan liber na Colombia, polis di Colombia a informa.
Ramiro Castrillón, director di polis di trafico a splica cu e regionnan cu a keda afecta ta Cundinamarca y Boyacá y otro region mas na centro di Colombia manera Huila y Putumayo, na sur y region di Casanare (este) tambe.
Na Bogota e awasero a kibra un dak di un centro comercial y el a laga como 10 persona herida. E grupo di persona aki a sali for di hospital caba y nan ta recuperando nan salud.
Tambe, Organisacion di Coordinacion di Asunto Humanitario di Nacionnan Uni (OCHA) a informa di e desbordamento di tres riu y dos rooi mas na departamento di Cauca, na zona sur di Colombia cu a laga mas di 5 mil persona damnifica pa fin di luna di october.
Fin di e siman aki, ora cu ta celebra e dia di tur santo na Colombia, e pais aki tabata anticipa un mobilisacion di tres miyon di auto.
Tocante cantidad di accidente, Castrillon a bisa cu te awe nan a registra mas di 26 accidente, caminda 5 persona a perde nan bida.
