Claridad y confusion tocante e refineria…

Despues di su ultimo biahe pa Merca, nos prome minister a bin cu cierto claridad y den otro sentido a laga nos cu cierto confusion tocante e refineria. Di un banda el a duna un splicacion bastante extenso, tanto den su rueda di prensa como ayera den parlamento, di con e deliberacionnan na Merca a bay, specialmente cu e entidad cu ta controla fluho di placa pa y di exterior, OFAC (Office of Foreign Assets Control). Di esey caba nos por saca algun conclusion interesante.

Manera henter e asunto tocante e famoso License 7-A. Ta gobierno mes a causa e prome confusion bisando cu e license, un excepcion riba e prohibicion pa haci negoshi y traspasa placa pa Pdvsa y su subsidiarionan, tabata un licencia special pa Aruba. Ta e medio aki tabata e unico cu a coregi esey y a publica copia di e documento, pa tur lector por saca nan conclusion, cu tabata un licencia pa Citgo.

Awor e storia a cambia y ta bisa cu Citgo a desmenti cu e licencia tabata conta pa e proyecto di rehabilitacion na Aruba tambe, mientras cu Aruba a bisa cu si, y awor lo a haya di tende di OFAC cu Citgo no a informa cu e licencia lo a encera continuacion di e proyecto na Aruba, sino cu nan tabatin intencion di “wind down” e proyecto. Palabranan di nos prome minister ayera den parlamento. En todo caso, di tur esaki nos por conclui cu Citgo, den man di e gobierno interino di Guaido, no tin interes di continua cu e proyecto na Aruba. Esaki ta implica tambe cu e comision cu ta bay instala proximamente pa analisa e opcionnan cu Aruba tin cu e refineria, manera e mandatario a anuncia, no lo tin tanto di studia riba e opcion aki: “einde verhaal” manera e Hulandesnan ta bisa. Aki no tin confusion, manera nos ta mira e asunto.

Pero e confusion ta bolbe ora ta cuminsa papia di e opcionnan pa otro operador bin haci loke no a logra den tur e añanan aki. Y den e proceso ta mezcla informacion incorecto y confusivo cu ta crea e impresion eroneo cu di e manera aki si, cu otro operador, por logra ainda pa habri e refineria atrobe. Den e intento ey ta trece e posibilidad pa sigui e ehemplo di St Croix, cu tambe a mira un refineria cera na 2012, mescos cu Aruba, y cu ta den proceso pa habri atrobe. Pa completa e informacion, lo siguiente di St Croix. E refineria Hovensa tabata 50% propiedad di Hees Oil y 50% di Pdvsa. E tabata un di e refinerianan miho ekipa y manteni na momento di ciere, y cu un capacidad di casi 500.000 bari pa dia un di e refinerianan mas grandi di e region aki. Como cu St Croix ta teritorio Mericano, Hovensa tabata produci e.o. gasolin y diesel di bon calidad pa su clientenan, mayoritariamente riba East Coast Mericano. Kico a kibra e negoshi anto? E refinerianan riba costa Mericano casi tur a cambia pa usa gas natural na lugar di fuel oil den nan proceso di destilacion. Esey tabata un bentaha enorme, ya cu gas natural ta como cuatro biaha mas barata cu fuel oil… Y como cu tabata trata di un isla, regla suministro di gas tabata un problema demasiado complica y despues di perdidanan biyonario, a dicidi di cera e planta.

Cu tin interes atrobe pa habri e refineria, por ta, pero no di e companianan grandi cu tin acceso na nan propio crudo. Nos ta curioso pa sa e ‘business model’ di e iniciativa pa bay opera na St Croix atrobe. No mester lubida cu tanto den e iniciativa na Aruba di Citgo, y e plan di Pdvsa pa continua na Curaçao, tabata contempla e necesidad di trece gas natural na e islanan, via tuberia submarino, pa por garantisa un proceso rentable.

Awor, manera nos prome minister mes ta remarca, St Croix tin un refineria… Aruba no. Nos tin un monton di chatarra, cu poniendo hopi inversion lo por funciona como upgrader pa crudo ultrapisa. Pero, si nos exclui Venezuela como supplier, ta ken anto? Pasobra basicamente riba e continente aki, y pafo di esey tambe, e paisnan cu mester upgrade nan crudo ta Canada (e ‘tar sands’ di Alberta) y e crudo ultrapisa di Faha di Orinoco na Venezuela. Otro calidadnan di crudo pisa, manera crudo Maya di Mexico, no ta asina pisa y por procesa esaki directamente sin mehoracion previo. Es decir, si Venezuela no ta un opcion pa suministra e upgrader cu crudo, ‘end of the story’…

Claro cu oposicion actual, cu a pinta asina un pantaya bunita di e refineria cu lo a habri atrobe den nan colaboracion cu e criminalnan mas grandi di e continente aki, lo bisa cu tur esaki ta maniobra di e prome minister pa finalmente yega na opcion tres: un Aruba sin refineria. Esey bo por mir’e asina. Sin embargo no ta cuestion di cu ‘Aruba ta birando victima di e manipulacion’ di e mandatario. Ta e curso di evento natural ta hibando nos den e direccion aki. Anto nos mester keda hunga ‘caco scondi’ na luga di gara nos destino den nos mes man?

 

You May Also Like

IMF a cambia manera di traha?

Of esnan cu a papia cu nan a cambia? Recientemente delegacion di Fondo Monetario ...

Temporada di biahamento a cuminsa, o nunca a caba?

Den un carta dirigi na Tweede Kamer, secretario di estado Knops ta informa e ...

Caso Ibis un les…? Pa ken anto?

Den e caso Ibis nos por a nota bastante comentario cu ta bay den ...

Aruba tin suficiente cifra? Ainda falta…

Tur pais desaroya, o cu kier yama nan mes desaroya, mester dispone di excelente ...

editorial 2_15_1.jpg

Ministro nobo, ‘Ball game nobo’?

Ministro Arends por cambia maneho di economia?   Desde algun siman nos tin un ...

Cifra dudoso den analisis AIB

Cu bastante fanfaria atrobe a publica e partinan aparentemente clave di e rapport di ...