“ODCA, e organisacion cu ta conta cu 27 partido miembro, representando 23 Pais den Centro, Sur America y Caribe ta un factor sumamente importante pa fomenta y fortalece e balornan riba cual partidonan Social Cristian, cu enfoke humanista ta recoge nan ideologia y vision pa futuro.

Pa e motibo aki mi a sinti mi mes bendiciona y honra di por a representa Partido AVP na e di 23 Congreso Statutario di ODCA na Mexico”, tabata palabranan di Clifford Heyliger riba su participacion na e congreso importante aki. Recientemente Clifford Heyliger a wordo nombra tambe den e directiva nobo di AVP y encarga cu temanan di relacionnan internacional. Esaki tabata su promer mision representando AVP y Aruba internacionalmente.

“Mi a drenta politica, pasobra di mi fe, mi creencia cu ta fortifica mi conviccion cu servicio publico mester wordo compaña cu un mision humano transcendental. Nos caminda padilanti mester ta hancra fuertemente den balornan profundo. Amor prohimo mester ta nos guia continuo, e marco di referencia pa nos duna contenido y busca e bon comun pa nos Pais y sociedad. Den ODCA ta contempla y profundisa continuamente e temanan aki y p’esey mi a sinti e balor grandi di a haya e oportunidad pa a representa AVP na e congreso aki, Clifford Heyliger a subraya.

E honor aki a haya un dimension mas local y cerca na momento cu mi por tabata parti di e votacion na e Congreso cu a eligi nos lider di partido, Mike Eman como Vice-presidente di e instituto aki hunto cu un Presidente nobo den calidad di Mariana Gómez del Campo Gurza (Partido Accion Nacional, Mexico). Un reconocimento importante pa Aruba, AVP y Mike Eman cu promer tabata Vice-presidente pa e area di Caribe y awor a bira un di e Vice-presidentenan di henter e organisacion.

Clifford Heyliger ta splica cu temanan di e congreso tabata varia pero a enfoca principalmente riba e principionan Cristian Democrata cu ta solidaridad, responsabilidad comparti, equidad publico y nos responsabilidad pa e futuro. Hopi pais ta sufriendo pa falta di liderazgo cu vision y un guia transcendental. E concepto di amor prohimo y e buskeda di e bon comun ta bay perdi den Paisnan caminda e gobernacionnan no ta mira mas e necesidad di Pueblo pero unicamente kier busca y mantene poder den un forma totalitario pa privilegia un grupo selecto, mientras e pueblo ta sufri.

Un bes mas den ODCA nos a reafirma nos compromiso pa ofrece nos pueblonan den nos Paisnan e caminda di bon comun, sea den nos gobernacionnan of den opcion alternativa pa gobernacionan cu ta riba e mal caminda.

Clifford Heyliger ta subraya cu amor prohimo ta pone cu bo ta mira, scucha y sinti bo mes como politico un cu e necesidadnan den pueblo, nan ta bo rumannan. E ta pone cu bo ta realisa cu gobernacion no ta pa bo partidarionan pero pa tur bo rumannan. E ta pone cu bo ta realisa cu bo ta un yiu di esnan cu a bay bo dilanti. Cu respet y gratitud pa nan sacrificio, cu conocemento di nan balornan bo ta biba den e presente y bataya hunto cu bo rumannan pa un presente y futuro prometedor. Realisando cada bes tambe cu bo ta un ruman grandi pa esnan cu mester bin ainda. “You are your borthers keeper” Clifford ta enfatisa. Asina, mientras bo ta esforza bo mes cu balornan humanista pa haci e presente mihor bo ta habri caminda pa e futuro.

Unicamente cu un strea di guia bo por ta para asina den e presente, conectando pasado cu futuro y futuro cu pasado. E buskeda di e bo comun ta e compas. Den ODCA, Clifford Heyliger ta splica ta e temanan aki di nos responsabilidad nos a reflexiona riba dje y a subraya e caminda padilanti. Locual nos ta haci tambe den AVP.

Clifford Heyliger a splica tambe cu den e conferencia anterior na Costa Rica den cual Mike Eman y Robert Candelaria a representa AVP a keda acorda un resolucion pa AVP tuma e iniciativa pa establece na Aruba un Centro di Formacion Politico pa region. E concepto aki ya AVP ta desaroyando hunto cu Rycond Santos do Nascimento den Fundacion Digna Lacle Herrera. Awor cu COVID a pasa por bay dun’e e contenido internacional y regional manera acorda cu ODCA.

“Mi a bin bek cu hopi animo pa sigui lucha y sigur hopi inspira pa a mira e admiracion cu tin pa partido AVP y nos lider Mike Eman cu a haya hopi elogio di e Presidente saliente Juan Carlos Latorre y esun entrante. Ambos a expresa nan admiracion pa e calidanan humano di nos lider y visionnan desplega den liderazgo na Aruba y contento cu e lo ta den e team nobo di ODCA”. un Clifford Heyliger hopi satisfecho cu su participacion na ODCA a termina expresando.

 

LEAVE A REPLY

Please enter your comment!
Please enter your name here