Casnan di anciano na Corsou ta depende fuertemente riba donacionnan di pueblo pa por duna cuido, ya cu e subsidio cu gobierno ta duna ta asina tiki, cu e ancianonan ta haya nan mes obliga di comparti nan propio cuminda cu otronan.

Esaki segun un relato di Dulce Koopman pa portal noticiero online, Ret Karibense.

Segun e relato, e situacion ta asina serio cu hasta ta ‘normal’ pa e enfermeronan subi caya pa colecta placa pa duna cuido. Na por lo menos dos cas di cuido di anciano na Corsou tabatin racionamento di cuminda, un hecho cu a keda confirma pa parlamentario Elvin Gerard di PNP. “Nan a haya nan ta corta fo’i e tayo. Merdia, en bes di nan haya dos pia di galiña, cada persona ta haya un. Awor mi ta pensa: esun di mainta awo cu ta snechi pan? Un snechi pan so en bes di dos snechi?”, Gerard a bisa Ret Karibense. E parlamentario ta sugeri pa gobierno bin cu control.

Un di e casnan di cuido mas conoci na e isla, Betesda, apenas por funciona cu e subsidio cu ta ricibi di gobierno, y asina ya pa februari ultimo a recauda donacionnan pa un total di 25mil florin. E cas di cuido tambe a dicidi di no paga belasting pa por tin placa pa ‘bon cuminda’, pampers y otro productonan esencial.

Ademas, a organisa un concierto di Dia di Mama pa recauda fondo pa un proyecto specifico.

Cinco otro cas di cuido

Fundacion Birgen di Rosario, cu ta maneha cinco localidad, tambe a cuminsa cu recaudacion di fondo, ya cu nan tin necesidad di mueble y material cu por yuda e clientenan den bida diario – pero no por conta cu gobierno.
“Tur aña nos ta tene nos colecta”, director Indra Rossum a bisa Ret Karibense. Pero lamentablemente esaki ainda no ta dunando bon resultado, y e Fundacion ta haya su mes ta suplica comunidad pa yuda cu un donacion. “Laga nos no lubida riba e aporte cu nos grandinan a duna comunidad di Corsou.”

Director di Betesda, Natasha Rog, a bisa Ret Karibense cu e tarifa cu gobierno ta paga pa cama pa pashent, loke ta e subsidio, ta exclusivo pa operacion y mantencion di e edificio y no ta suficiente pa nan por duna servicio. Y mientras cu ainda ta logra cumpra e suministronan necesario a pesar di aumento di costo di bida, nan ta teme cu no lo por dura hopi mas. Ta premira cu pronto lo cuminsa bira dificil pa paga gastonan regular.

Ademas ta lucha cu falta di espacio den e edificio di Betesda. “No tin espacio pa nan mobilisa. Aworaki nos ta haya ta pone nan riba gang, den un rij asina. Un situacion cu no ta bon pa calidad di bida.”
Un ‘overdekte’ por ta un solucion pero esaki lo rekeri aproximadamente 350mil florin. “Esaki ta nos soño pa Betesda”, Rog a bisa. “E habitantenan por sinta, come y hasta haci actividadnan sin e overkapping, pasobra ta yen biento tin akinan, con e awasero ta cay akinan y e solo. Naturalmente tin diferente tipo di pashent. Tin pashent cu por sinta stret riba un rolstoel, pero tin di nan cu mester sinta un tiki mas drumi. Nan tin mester di un tiki mas espacio.”

Bancarota
A pesar di e situacion grave, Betesda no lo cera su portanan. Segun Rog, ta ‘demasiado importante’ pa e cadena di cuido na Corsou.

Betesda no a logra den su intentonan pa haya fondo for di Hulanda, pasobra e instancianan Hulandes ta exigi pa un situacion financiero saludable. “Nos no tin esey aworaki, nos presupuesto no ta cera, nos no por cumpli cu nos obligacionnan y en realidad nos ta bancarota.”

Parlamentario Gerard a indica cu tin un comision cu pronto lo bin cu recomendacionnan pa cuido pa adultonan mayor. A base di e resultadonan di e comision, ta bay determina entre otro pa adapta e subsidio pa casnan di cuido di anciano.

Potret di Ret Karibense.

LEAVE A REPLY

Please enter your comment!
Please enter your name here