Durante un conferencia di prensa, Sr. Andy Farro, PR di Club Caiquetio, Sr. Joy Fingal, Secretario general di Club Caiquetio y Sr. Persey Jeandor di Fundacion Pro Cultura Arubano a anuncia e regreso oficial di bingo den Club Caiquetio y a splica tambe e detayenan di e evento cu lo tuma luga dia 26 di november.
Sr. Fingal, den representacion di Club Caiquetio a splica cu pa motibo di e pandemia, cu a trece hopi contratiempo pa hopi hende, Club Caiquetio tin dos aña tambaliando. En bista di esaki, y el a indica, cu e directiva di e club a dialoga ariba ideanan di kico nan por haci pa Club Caiquetio yega back caminda e tabata prome, y asina nan a yega na e decision di cuminsa cu bingo back den Club Caiquetio.
Fingal a splica tambe cu hopi hende cu e ta topa ariba caya, ya ta puntra ki tempo Club Caiquetio lo cuminsa cu su bingo back, y esey tambe a duna e directiva un tiki forsa pa nan a yega na e decision pa cuminsa cu e bingo e luna aki.
“Nos ta back cu Caiquetio, pasobra manera mi a bisa caba hopi hende ta puntra esaki y nos tin cu complace nan. Caiquetio ta un club unda cu tabatin masha hopi diferente actividad. E ta un club cu ta yuda scolnan, clubnan, organisacionnan deportivo etc.”, el a bisa.
El a menciona cu pa nan por mantene e club, den e sentido di mantencion, verfmento, tene e luga limpi, etcetera e ta costa placa y e situacion cu e pandemia a pone cu no tin e entrada suficiente pa logra e mantencionnan aki. E directiva di Club Caiquetio tin speransa cu tur cos lo desaroya den un manera positivo a asina nan por sigui organisa e bingo.
“Nos ta sumamente contento cu nos por anuncia e bingo di Club Caiquetio cu a haci falta na un y tur. Porfin en bes di hunga bingo na cas so, bo por bin cerca nos, bin topa bo bisiña, bin topa bo familiar na e bingo di Club Caiquetio”, Sr. Andy Farro, PR di Club Caiquetio, a expresa.
Sr. Farro a señala cu Club Caiquetio a haci bastante inversion pa por yega na organisa nan prome bingo back. El a splica cu nan tin un mashin completamente nobo cu tur e facilidadnan pa por haci e bingo aki un realidad.
E cantidad di persona cu por t’ey na Club Caiquetio pa hunga e bingo lo ta maximo 400 hende y e cantidad ey ta basa ariba e protocolnan di crisis team y DVG. Sr. Farro a splica tambe cu lo bay tin mesanan di tres persona disponibel unda cu tres persona por sinta cu nan distancia completo caminda nan lo sinti sigur e na e mesa pa hunga nan bingo y lo tin pantayanan grandi tambe pa wak e bingo.
El a menciona tambe cu e bingo lo wordo transmiti live y esunnan cu no tin e oportunidad di hunga den Club Caiquetio por haci for di e comodidad di nan propio hogar. “Na momento cu bo ta den Club Caiquetio y bo canta bingo bo lo haya un premio extra. Na momento cu bo ta na cas y bo bingo sali, door di nos software sofistica bo ta haya dos minuut pa yama pa nos por controla bo bingo si e ta corecto y tambe bo lo haya bo premio sigura”, el a bisa,
Club Caiquetio tambe ta ofrece na organisacion-, club-, of stichtingnan, cu tambe kier organisa un bingo y recauda fondo un pakete cu ta inclui tur cos di bingo, cushina, camara, carchi di bingo cu e club mes ta print y tur cos ta ultimo modelo.
“Club Caiquetio ta cla pa cuminsa e era nobo di bingo den Club Caiquetio”, Sr. Farro a agrega.
