Colegio Arubano ta bay organisa un evento na luna di november pa haya fondo necesario pa cambia trailernan den cual e muchanan ta haya les. Di e forma ey muchanan por tin un lokaal di miho calidad y mas duradero.

Kimberly Kuiperi, kende ta e coordinador di e proyecto, a bisa cu e evento di Colegio Arubano tambe ta den conexion cu 60 aña di existencia. Pa e motibo aki a dicidi di organisa un evento caritativo ‘The Reunion’.

Kuiperi ta splica cu e idea ta pa haci un yamada pa tur persona cu a bay Colegio, y tambe pa esunnan cu no a bay pero ta mayor di un studiante cu ta atende, pa aporta na e causa aki. E ta bisa cu tur placa cu recauda lo ta pa drecha e facilidad di scol den ‘e prome fase’.

Nan ta mira e prome parti pa trece un solucion ‘a corto plaso’ pa e situacion di trailer. E ta agrega cu edificio nobo di Colegio Arubano mes su añanan a pasa y edificio asina mester mantencion pa sosten’e mas largo.

E ticket pa evento ‘The Reunion’ ta obtenibel na Citgo Palm Beach, Citgo Essoville, Paradera gas station y Citgo Boulevard y na scol mes por haya ticket.

Kuiperi ta splica cu evento ta pa tur hende cu kier atende y di tur edad. “No pasobra bo no atende Colegio, kier men cu bo no mag di bin. E ta un evento pa tur hende y di tur edad. Lo bay tin bon cushina y alcohol, pues mester tin 18 aña pa por bebe, pero e evento mes ta pa tur edad.”

Pa personanan cu cera un grupo di 10 persona, lo haya ticket na prijs special. Kuiperi ta bisa cu e suma specifico ta di 100.000 florin cu nan kier logra yega. Nan ta bisa cu ta acercando compania pa nan forma parti di e sistema di donacion aki.

E ta expresa cu nan ta contento cu asistencia di compania cu ta yudando e fiesta pa recauda fondo. E evento mes lo tuma luga na scol. E ta bisa cu ta un momento caminda ex studiante por corda di nan pasado y momento cu a atende e scol.

Pa e motibo aki, Kuiperi ta haci yamada pa tur persona cu a atende Colegio Arubano pa asisti dia 23 di november, di 7or pa 12or pa reviva e momento y aporta pa un causa, ‘esaki ta bo chens’. Nan ta confia cu evento lo ta un exito y lo sigui conscientisa comunidad con e situacion di scol ta.

Pa mas informacion por subi riba Colegio Arubano su pagina di Facebook of por yama na 585-2005 pa locual ta trata informacion di e pakete tocante e prijs. Kuiperi tambe bisa cu lo tin musica di Tsunami y Robert Jeandor y su solo banda show. “Henter e comunidad por forma parti di entretenimento.”

Pa finalisa, Kuiperi a bisa cu ta un bon forma pa corda cu hopi profesional di Aruba ta di Colegio Arubano, y como base, ta pidi di un manera of otro pa yuda den e causa pa fin di aña, y cu pa asisti na e evento, ‘esey ta e miho manera pa haci esaki’.