(NTN24) – Diasabra ultimo 4 di februari, Forsa Aereo Colombiano a informa cu un globo aerostatico a bula den su teritorio, similar na esun cu Merca a wak cu ta bulando riba Latino America.
Den sentido aki, institucion adhunto na Estado Colombiano a sostene cu e artefacto a wordo identifica diabierna ultimo mainta riba e costa di e pais cafetero y tabata wordo monitoria tanten el a bandona espacio aereo nacional.
“Sistema di Defensa Aereo Nacional a detecta un obheto riba 55.000 pia di haltura, cu a drenta na espacio aereo Colombiano na sector nort di e pais, mobilisando na un velocidad di 25 nudo, identificando den dje e mesun caracteristicanan similar na esun di un globo,” Forsa Aereo Colombiano a señala den un comunicado.
Tabata precisamente vocero di Departamento di Defensa di Merca, ken dia 3 di februari a splica cu un segun globo “di vigilancia” presuntamente di origen Chines a wordo observa bulando riba Latino America.
Despues di e anuncia dia 4 di februari, Pentagono a indica cu un avion di combati nort Americano a benta abou e presunto globo spion Chines dilanti di e costa Atlantico di Merca.
Di su parti, corant La Nacion di Costa Rica e mesun diasabra a publica un noticia den relacion cu un obheto bulado blanco, cu tabata parce un globo aerostatico, segun Cas Blanco, e dispositivo ey por ta e mesun cu a bula na Colombia.
