Por lo menos 23 preso a muri y 83 a keda herida na prizon Modelo di Bogota durante disturbionan di diadomingo ultimo na varios prizon Colombiano den protesta pa e aglomeracion y falta di elementonan pa preveni contagio di coronavirus, minister di Husticia, Margarita Cabello Blanco a informa.

“Resultado di intento di huy na Modelo tabata di 23 persona priva di libertad cu a muri, 83 priva di libertad a keda herida, di cual 32 ta den centro hospitalario”, Cabello Blanco a bisa.

Cabello a detaya cu a causa di loke el a califica como ‘intento masivo y criminal di huy na centro penintenciario Modelo y disturbio na otro prizon di e pais’, tambe a resulta herido 7 funcionario di Instituto Nacional Penitenciario y Carcelario (Inpec), ‘dos di e ken ta den estado critico’.

General Norberto Mujica, director di Instituto Nacional Penitenciario y Carcelario (Inpec), a sostene cu guardia penitenciario a actua lihe, loke a permiti cu por lo menos cinco mil persona no lo huy. “Awe e situacion ta bou control, e accion rapido di nos cuerpo di custodio a evita cu e plan di huy a tuma luga”, e funcionario a sigura.

Durante e disturbionan, e detenidonan a provoca candela, enfrenta e guardia y a purba di tuma control di e prizon pa scapa, autoridadnan a detaya.

Procurador General di Colombia, Fernando Carrillo a exigi cu ‘pa motibo di e grave incidentenan cu a sucede den oranan ultimo na establecimento penitenciario di e pais, ta urgi pa un declaracion inmediato di emergencia den prizonnan, pa garantisa condicionnan di salud, haci efectivo e derechonan y mantene orden publico’.

 

LEAVE A REPLY

Please enter your comment!
Please enter your name here